ដោយដកស្រង់សម្តីមន្ត្រីអាមេរិកម្នាក់ និងប្រភពដែលដឹងពីបញ្ហានេះ សារព័ត៌មាន Axios នៅថ្ងៃសុក្រ (ទី៣ ខែមីនា ឆ្នាំ២០២៦) នេះ បានរាយការណ៍ថា សហរដ្ឋអាមេរិក បានបណ្តេញឯកអគ្គរដ្ឋទូតរងរបស់ប្រទេសអ៊ីរ៉ង់ ប្រចាំអង្គការសហប្រជាជាតិ (UN) ដោយស្ងាត់ៗ កាលពីចុងឆ្នាំមុន ដោយសារក្តីបារម្ភពីសន្តិសុខជាតិ។

ក្រសួងការបរទេសសហរដ្ឋអាមេរិក ត្រូវបានរាយការណ៍ថា បានបញ្ជាឲ្យអ្នកការទូតអ៊ីរ៉ង់ លោក Saadat Aghajani ចាកចេញពីប្រទេស កាលពីដើមខែធ្នូឆ្នាំ តាមរយៈដំណើរការផ្ទៃក្នុងដ៏សម្ងាត់មួយ ដែលជាការបណ្តេញឯកអគ្គរដ្ឋទូតអ៊ីរ៉ង់យ៉ាងហោចណាស់ ៣ដង នៅទីក្រុង New York ក្នុងរយៈពេល ៦ខែ។

សារព័ត៌មាន Axios បានដកស្រង់សម្តីមន្ត្រីក្រសួងការបរទេសម្នាក់ ដែលបាននិយាយថា៖ «យើងអាចបញ្ជាក់បានថា សហរដ្ឋអាមេរិកបានចេញសារការទូតជាលាយលក្ខណ៍អក្សរ នៅថ្ងៃទី៤ ខែធ្នូ ឆ្នាំ២០២៥ ទាក់ទងនឹងស្ថានភាពរបស់បុគ្គលិកអ៊ីរ៉ង់មួយចំនួន នៅ UN។ ដោយសារហេតុផលឯកជនភាព និងសន្តិសុខ យើងមិនអាចធ្វើការអត្ថាធិប្បាយ ជុំវិញភាពជាក់លាក់នៃវិធានការលើបុគ្គលិកការទូតនេះបានទេ»។

មន្ត្រីរូបនេះបានបញ្ជាក់បន្ថែមថា ចំណាត់ការនេះបានកើតឡើងមុនពេលមានការតវ៉ា នៅក្នុងប្រទេសអ៊ីរ៉ង់ ហើយមិនទាក់ទងនឹងព្រឹត្តិការណ៍ទាំងនោះទេ។

របាយការណ៍របស់សារព័ត៌មាន Axios បានឲ្យដឹងទៀតថា ទីក្រុងវ៉ាស៊ីនតោនបានប្រើប្រាស់នូវអ្វីដែលគេស្គាល់ថា ជា «នីតិវិធីមាត្រា ១៣» ជាយន្តការផ្ទៃក្នុងមួយដែលអនុញ្ញាតឲ្យមានការបណ្តេញឯកអគ្គរដ្ឋទូតដោយស្ងាត់ៗ ជាជាងការប្រកាសជាផ្លូវការថា «បុគ្គលរូបនោះមិនត្រូវបានស្វាគមន៍»។

បេសកកម្មរបស់អ៊ីរ៉ង់ប្រចាំ UN ត្រូវបានគេរាយការណ៍ថា បានបដិសេធមិនធ្វើអត្ថាធិប្បាយអ្វីឡើយ ពាក់ព័ន្ធនឹងសេចក្ដីរាយការណ៍នេះ។ នេះយោងតាមសារព័ត៌មាន Axios៕