បើយោងតាមសេចក្ដីរាយការណ៍របស់សារព័ត៌មាន Reuters ដែលដកស្រង់ពីទីភ្នាក់ងារសារព័ត៌មាន Mehr របស់អ៊ីរ៉ង់ បានឲ្យដឹងថា នៅថ្ងៃសុក្រ (ទី៣ ខែមេសា ឆ្នាំ២០២៦) នេះ ទីក្រុងទេអេរ៉ង់បានអះអាងថា យន្តហោះចម្បាំង F-35 ទី២ របស់សហរដ្ឋអាមេរិក ត្រូវបានបាញ់ទម្លាក់ នៅលើភាគកណ្ដាលប្រទេស។ 

ហើយសេចក្ដីរាយការណ៍នេះ បានបញ្ជាក់បន្ថែមថា អ្នកបើកយន្តហោះ មិនទំនងជានៅរស់រានមានជីវិតនោះទេ។ មិនមានការបញ្ជាក់ភ្លាមៗ ពីអាជ្ញាធរអាមេរិកនៅឡើយ។

ការអះអាងនេះបានកើតឡើង ២សប្តាហ៍បន្ទាប់ពីយន្តហោះចម្បាំងបំបាំងកាយ F-35 របស់សហរដ្ឋអាមេរិក ត្រូវបានវាយប្រហារ ក្នុងអំឡុងពេលធ្វើបេសកកម្មប្រយុទ្ធ នៅអ៊ីរ៉ង់ ដោយត្រូវបង្ខំចុះចតបន្ទាន់ នៅមូលដ្ឋានទ័ពអាកាសអាមេរិក នៅតំបន់មជ្ឈិមបូព៌ា។ នាពេលនោះ មន្ត្រីអាមេរិកបានឲ្យដឹងថា អាកាសយានិក មិនមានគ្រោះថ្នាក់ ហើយស្ថិតក្នុងស្ថានភាពមានស្ថិរភាព។

នៅមុននេះ អ៊ីរ៉ង់បានឲ្យដឹងថា ខ្លួនបានវាយប្រហារយន្តហោះដោយប្រើប្រព័ន្ធការពារដែនអាកាសរបស់ខ្លួន ដោយនេះអាចជាលើកដំបូង ដែលប្រទេសនេះបានវាយប្រហារយន្តហោះទំនើបបំផុតមួយរបស់សហរដ្ឋអាមេរិក ក្នុងអំឡុងពេលមានជម្លោះដែលកំពុងបន្តនេះ។

យន្តហោះចម្បាំង F-35 Lightning II ត្រូវបានចាត់ទុកថា ជាយន្តហោះចម្បាំងទំនើបបំផុតមួយ ដែលកំពុងបម្រើការ និងជាផ្នែកសំខាន់មួយនៃកម្លាំងទ័ពអាកាសរបស់សហរដ្ឋអាមេរិក និងសម្ព័ន្ធមិត្ត។ ដោយមានតម្លៃជាង ១០០លានដុល្លារ ក្នុង ១គ្រឿង យន្តហោះនេះត្រូវបានដំណើរការ ឬបញ្ជាទិញដោយប្រទេសជាង ១៩ ហើយស្ថិតក្នុងចំណោមយន្តហោះចម្បាំងជំនាន់ទី៥ ដែលត្រូវបានដាក់ពង្រាយយ៉ាងទូលំទូលាយបំផុត នៅលើពិភពលោក៕