ក្មេងៗជម្លៀសខ្លួននៅទីក្រុង Dhour El Choueir របស់ប្រទេសលីបង់ បានជួបជុំគ្នានៅទីជម្រកប្រែកក្លាយជាសាលារៀន ដើម្បីចូលរួមសកម្មភាពគូរគំនូរដឹកនាំដោយវិចិត្រករលីបង់លោក Abed Al Kadiri ។

ក្រុមអ្នករៀបចំ និងអ្នកចូលរួមនិយាយថា សកម្មភាពគូរគំនូរទាំងនេះ នឹងជួយក្មេងៗដែលភាគច្រើននៃពួកគេ បានប្រឈមនឹងការជម្លៀសខ្លួន និងសង្រ្គាម មានឱកាសបង្ហាញអារម្មណ៍ និងស្មារតីរបស់ពួកគេ ។

អ្នកស្រី Rasha Salim ដែលជម្លៀសខ្លួនចេញពីតំបន់ភាគខាងត្បូងលីបង់និយាយថា ក្មេងៗបានបង្ហាញពីអារម្មណ៍ដែលពួកគេមាន ដែលពួកគេពីមុនមិនអាចបញ្ចេញបាន ។

គំនិតផ្តួចផ្តើមនេះ នឹងផ្តល់ឱកាសដល់ក្មេងៗនូវការផ្គត់ផ្គង់សិល្បះ ដើម្បីឲ្យពួកគេបន្តគូរគំនូរនៅផ្ទះ ផ្តល់ឲ្យតិចតួច ប៉ុន្តែជាអារម្មណ៍ស្ថិរភាព ស្របពេលជម្លោះកំពុងបន្ត ។

លោក Al Kadiri និយាយថា ក្រដាសទទេស្អាតនឹងប្រាប់ពួកគេថា អ្នកអាចនិយាយអ្វីក៏បានឲ្យតែអ្នកចង់និយាយថា អ្នកអាចបង្ហាញអ្វីជាអារម្មណ៍ពិតរបស់អ្នកបាន ។

គំនិតផ្តួចផ្តើមសិល្បះនេះដែរ បានចាប់ផ្តើមកាលពីរយៈពេលជិត ៦ឆ្នាំមុន បន្ទាប់ពីការផ្ទុះកំពង់ផែក្រុងបេរូត ពេលដែលស្នាដៃសិល្បះរបស់លោក Al Kadiri រងការខូចខាតនៅក្នុងសាល ជាទីដែលលោកតាំងពិព័រណ៍ ។ 

ក្រោយមកលោកបានគូរគំនូរដើមឈើរនៅលើជញ្ជាំងសាល និងលក់ស្នាដៃសិល្បះរបស់លោកចំនួន ៨០ផ្ទាំង ដើម្បីគាំទ្រដល់មនុស្ស ៥០គ្រួសារដែលរងផលប៉ះពាល់ដោយសារហេតុការណ៍ផ្ទុះនោះ ។

គម្រោងមួយនេះ បានធ្វើឡើងម្តងហើយម្តងទៀតជាច្រើនលើកច្រើនសារ ក្នុងកិច្ចខិតខំមនុស្សធម៌ របស់វិចិត្រកររូបនេះ ដោយផ្តោតសំខាន់លើការងារគាំទ្រគ្រួសារ និងក្មេងៗ ។

ចាប់តាំងពីសង្រ្គាមផ្ទុះឡើង លោក Al Kadiri បានធ្វើការជាមួយសាលារៀនប្រហែល ៦កន្លែង ហើយនិងក្មេងៗ ២៥០នាក់ ដោយរូបលោកមានគោលដៅទទួលបានក្មេងៗ ១ពាន់នាក់ ។ ក្មេងម្នាក់ៗ ទទួលបានការផ្គត់ផ្គង់សិល្បះ ហើយលោកសង្ឃឹមថា គំនូរនឹងប្រែក្លាយជាកម្រងសៀវភៅ ដើម្បីគាំទ្រគ្រួសាររបស់ក្មេងៗ ។

ក្នុងរយៈពេលជាង ១ខែកន្លងមកនេះ លោក Al Kadiri រៃអង្គាសប្រាក់បានប្រហែល ២.៦០០ដុល្លារពីការបរិច្ចាគដែលលោកទទួលបានពីមិត្តភ័ក្តិ ដែលលោកយកមកចំណាយលើក្មេងៗប្រហែល ៣០០នាក់ ។ លោកត្រូវការប្រាក់ ៨.៥០០ដុល្លារ ដើម្បីចំណាយលើក្មេងៗប្រហែល ១ពាន់នាក់ ៕