កងម្លាំងអ៊ីរ៉ង់ កំពុងព្យាយាមស្វែងរកអ្នកបើកយន្តចម្បាំងសហរដ្ឋអាមេរិកម្នាក់ដែលបាត់ខ្លួន ក្រោយយន្តហោះចម្បាំងមួយគ្រឿង ត្រូវបានបាញ់ទម្លាក់កាលពីថ្ងៃសុក្រ ។

 អ៊ីរ៉ង់បានបាញ់ទម្លាក់យន្តហោះចម្បាំងអាមេរិក ២គ្រឿង គឺជាការវាយប្រហារដ៏កម្របំផុតមួយសម្រាប់សហរដ្ឋអាមេរិក ដែលមិនធ្លាប់កើតឡើងនោះទេអស់រយៈពេលជាង ២០ ឆ្នាំមកហើយ ហើយការបាញ់ទម្លាក់នេះក៏បានបង្ហាញពីសមត្ថភាពរបស់អ៊ីរ៉ង់ក្នុងការបន្តវាយបកវិញ បើទោះបីជាលោកប្រធានាធិបតីអាមេរិក Donald Trump បានអះអាងថា សាធារណរដ្ឋអ៊ិស្លាមមួយនេះត្រូវបានកម្ទេចទាំងស្រុងក៏ដោយ ។ 

ការវាយប្រហារបានកើតឡើងក្នុងសប្តាហ៍ទី ៥នៃជម្លោះ បន្ទាប់ពីយោធារបស់សហរដ្ឋអាមេរិក និងអ៊ីស្រាអែល បានចាប់ផ្តើមបាញ់ស្រោចលើអ៊ីរ៉ង់ នៅថ្ងៃទី២៨ ខែកុម្ភៈ ។ 

មន្ត្រីអាមេរិកបាននិយាយថា អ៊ីរ៉ង់បាញ់ទម្លាក់យន្តហោះចម្បាំងប្រភេទ F15-E មួយគ្រឿងរបស់ខ្លួន កាលពីថ្ងៃសុក្រ ក្នុងនោះសមាជិកកងទ័ពម្នាក់ត្រូវបានជួយសង្គ្រោះ ហើយប្រតិបត្តិការស្វែងរកកងទ័ពអាមេរិកម្នាក់ទៀតកំពុងធ្វើឡើង ។ 

ខណៈពេលនោះដែរ អ្នកនាំពាក្យកងឆ្មាំបដិវត្តន៍អ៊ីរ៉ង់ និយាយថា ប្រព័ន្ធថ្មីរបស់ពួកគេ បានបាញ់ទម្លាក់ផងដែរយានដ្រូន ៣គ្រឿង និងមីស៊ីលតម្រង់គោលដៅ ២គ្រាប់ របស់សហរដ្ឋអាមេរិក ។

ដោយឡែក ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា យន្តហោះវាយប្រហារប្រភេទ A-10 របស់អាមេរិកមួយគ្រឿងទៀតបានធ្លាក់ បន្ទាប់ពីរងការបាញ់ប្រហារដោយកងកម្លាំងការពាររបស់អ៊ីរ៉ង់ ។

 លោក Houston Cantwell មន្រ្តីទ័ពអាកាសចូលនិវត្តន៍ និងជាអតីតអ្នកបើកយន្តហោះចម្បាំង F-16 របស់អាមេរិក បាននិយាយថា លើកចុងក្រោយដែលយន្តហោះចម្បាំងអាមេរិកត្រូវបានសត្រូវបាញ់ទម្លាក់ក្នុងការប្រយុទ្ធបែបនេះ គឺជាយន្តហោះប្រភេទ A-10 Thunderbolt II ក្នុងអំឡុងពេលនៃការឈ្លានពានរបស់អាមេរិកលើអ៊ីរ៉ាក់ កាលពីឆ្នាំ២០០៣៕