កងពលតូចដឹកជញ្ជូនលេខ៩៩បន្តទទួលអំណោយពីបងប្អូនសប្បុរសធម៌នានា សម្រាប់យកទៅចែកជូនបន្តដល់វីរកងទ័ពជួរមុខ ជាពិសេសនៅតាមបណ្តោយ បន្ទាត់ព្រំដែនកម្ពុជា និងថៃ ខណៈអំណោយរបស់សប្បុរសជនទាំងនេះ បានបង្ហាញយ៉ាងច្បាស់អំពី«ទឹកចិត្តសមរភូមិក្រោយ»ដែលមិនដែលបោះបង់ ឬមើលរំលងសុខទុក្ខ និងវីរភាពរបស់កងទ័ពជួរមុខ ដែលកំពុងឈរជើងការពារព្រំដែន ការពារអធិបតេយ្យភាព និងបូរណភាពទឹកដីកម្ពុជានោះ។

ឧត្តមសេនីយ៍ទោ ហ៊ុល សំអុន មេបញ្ជាការកងពលតូចដឹកជញ្ជូនលេខ៩៩ បានថ្លែងអំណរគុណ ចំពោះសប្បុរសជនដែលផ្តល់ជំនួយជាបន្តបន្ទាប់នាពេលកន្លងមក ហើយក៏បានថ្លែងអំណរគុណចំពោះឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងមេបញ្ជាការកងរាជអាវុធហត្ថរាជធានីភ្នំពេញ ដែលបានឧបត្ថម្ភភេសជ្ជៈចំនួន១៥០កេស ជូនដល់កងពលសម្រាប់ប្រើប្រាស់ ជាប្រយោជន៍ជាក់ស្តែងក្នុងអង្គភាព ជាពិសេសម្រាប់នាំយកបន្ត ទៅចែកជូនដល់បងប្អូនវីរកងទ័ពជួរមុខ នៅតាមបន្ទាត់ព្រំដែន កម្ពុជា-ថៃ។

ឧត្តមសេនីយ៍ទោ ហ៊ុល សំអុន បានលើកឡើងទៀតថា ទឹកចិត្តដ៏សប្បុរសធម៌របស់បងប្អូនសប្បុរសជន និងឧត្តមសេនីយ៍ឯក រ័ត្ន ស្រ៊ាង នាពេលនេះ គឺបានឆ្លុះបញ្ចាំងពីស្មារតី សមរភូមិក្រោយ មិនដែលបោះបង់ ឬមើលរំលងសុខទុក្ខ វីរៈកងទ័ពសមរភូមិមុខ ដែលជាការរួមចំណែកការពារអធិបតេយ្យភាព និងបូរណភាពទឹកដី៕