នៅថ្ងៃអាទិត្យ (ទី៥ ខែមេសា ឆ្នាំ២០២៦) នេះ ក្រសួងហិរញ្ញវត្ថុកូរ៉េខាងត្បូង បានឲ្យដឹងថា លោករដ្ឋមន្ត្រី Koo Yun-cheol បានជួបជាមួយបេសកជនមកពីបណ្ដាប្រទេសឈូងសមុទ្រ ដើម្បីពិភាក្សាពីការទ្រទ្រង់សន្តិសុខថាមពល និងសុវត្ថិភាពនាវាកូរ៉េ (កូរ៉េខាងត្បូង) នៅជិតច្រកសមុទ្រ Hormuz ខណៈដែលសង្គ្រាមនៅអ៊ីរ៉ង់ដែលកំពុងកើនឡើង បានរំខានដល់ការដឹកជញ្ជូន។

ក្រសួងបានឲ្យដឹងនៅក្នុងសេចក្តីថ្លែងការណ៍ថា អំឡុងកិច្ចប្រជុំកាលពីថ្ងៃសុក្រនោះ លោក Koo បានស្នើឲ្យឯកអគ្គរដ្ឋទូតក្រុមប្រឹក្សាសហប្រតិបត្តិការឈូងសមុទ្រ (GCC) ធានាយ៉ាងជាប់លាប់នូវការផ្គត់ផ្គង់ប្រេង ឧស្ម័នធម្មជាតិរាវ សារធាតុណាហ្វថា (Naphtha) អ៊ុយរ៉េ និងធនធានសំខាន់ៗផ្សេងទៀត និងធានាសុវត្ថិភាពនាវា និងនាវិកកូរ៉េ នៅជិតច្រកសមុទ្រដ៏សំខាន់នេះ។

សេចក្តីថ្លែងការណ៍នោះ បានបន្ថែមថា បេសកជនទាំងនោះ បានលើកឡើងថា កូរ៉េខាងត្បូង គឺជាប្រទេស «អាទិភាពចម្បង» ហើយបានសន្យាថា នឹងមានទំនាក់ទំនងយ៉ាងជិតស្និទ្ធជាមួយទីក្រុងសេអ៊ូល ដើម្បីធានាបាននូវការផ្គត់ផ្គង់ប្រកបដោយស្ថិរភាព។ រដ្ឋសមាជិកទាំង៦ របស់ GCC គឺអារ៉ាប៊ីសាអ៊ូឌីត អេមីរ៉ាតអារ៉ាប់រួម កាតា គុយវ៉ែត អូម៉ង់ និងបារ៉ែន។

មិនខុសពីសេដ្ឋកិច្ចអាស៊ីដទៃទៀតដែរ កូរ៉េខាងត្បូងពឹងផ្អែកយ៉ាងខ្លាំងលើការនាំចូលថាមពល ក្នុងនោះរួមទាំងតាមរយៈច្រកសមុទ្រ Hormuz ផងដែរ ដែលជាផ្លូវឆ្លងកាត់សម្រាប់ប្រេង ២០ភាគរយរបស់ពិភពលោក មុនពេលសហរដ្ឋអាមេរិក និងអ៊ីស្រាអែល ចាប់ផ្តើមសង្គ្រាមកាលពីថ្ងៃទី២៨ ខែកុម្ភៈ។ ចាប់តាំងពីពេលនោះមក អ៊ីរ៉ង់បានបិទផ្លូវទឹកនេះយ៉ាងមានប្រសិទ្ធភាព ដែលជំរុញឲ្យតម្លៃថាមពលហក់ឡើងខ្ពស់ និងបង្កឲ្យមានកង្វល់ អំពីវិបត្តិសេដ្ឋកិច្ចពិភពលោក៕