ទីភ្នាក់ងារការពារជនស៊ីវិល និងមន្ទីរពេទ្យមួយ នៅតំបន់ហ្កាហ្សា បានរាយការណ៍ថា ការវាយប្រហាររបស់អ៊ីស្រាអែល លើជនស៊ីវិលមួយក្រុម នៅក្នុងដែនដីប៉ាឡេស្ទីន នាថ្ងៃអាទិត្យ (ទី៥ ខែមេសា ឆ្នាំ២០២៦) នេះ បានសម្លាប់មនុស្សយ៉ាងតិច ៤នាក់ ហើយជាច្រើននាក់ទៀតរងរបួស។

ការវាយប្រហារនេះបានកើតឡើងនៅមុនព្រះអាទិត្យរះ នៅក្នុងសង្កាត់ភាគខាងកើតនៃទីក្រុងហ្កាហ្សា ដែលជាតំបន់ទីក្រុងធំបំផុតរបស់ដែនដីនេះ។ នេះបើយោងតាមទីភ្នាក់ងារ ដែលដំណើរការជាកម្លាំងជួយសង្គ្រោះ ក្រោមការគ្រប់គ្រងរបស់ក្រុមហាម៉ាស។

ទីភ្នាក់ងារការពារជនស៊ីវិលមួយនេះ បានរាយការណ៍ថា៖ «ការវាយប្រហារតាមអាកាសរបស់អ៊ីស្រាអែល នៅមុនព្រះអាទិត្យរះ បានសម្លាប់មនុស្ស ៤នាក់ និងបណ្ដាលឲ្យមានរបួសជាច្រើននាក់»។

មន្ទីរពេទ្យ Al-Shifa នៅតំបន់ហ្កាហ្សា បានបញ្ជាក់ពីចំនួនអ្នកស្លាប់ និងរបួស ដោយប្រាប់ថា ការវាយប្រហារនេះត្រូវបានធ្វើឡើងដោយយានដ្រូនរបស់អ៊ីស្រាអែល។ មន្ទីរពេទ្យបានឲ្យដឹងនៅក្នុងសេចក្តីថ្លែងការណ៍មួយថា៖ «អ្នកបាត់បង់ជីវិត ៤នាក់ និងអ្នករបួស ៥នាក់ បានមកដល់មន្ទីរពេទ្យនៅព្រឹកនេះ បន្ទាប់ពីយានដ្រូនរបស់អ៊ីស្រាអែលបានបាញ់មីស៊ីល ២គ្រាប់ទៅលើក្រុមជនស៊ីវិល»។

ដោយត្រូវបានទាក់ទងទៅ ដើម្បីសុំការអត្ថាធិប្បាយ កងទ័ពអ៊ីស្រាអែលបានឲ្យដឹងថា ខ្លួនកំពុងស៊ើបអង្កេតលើរបាយការណ៍ទាំងនោះ។ បើយោងតាមក្រសួងសុខាភិបាលនៃតំបន់នេះ ដែលក៏ដំណើរការក្រោមអំណាចរបស់ក្រុមហាម៉ាសផងដែរនោះ បានឲ្យដឹងថា បើទោះបីមានបទឈប់បាញ់ក៏ដោយ ក៏អ៊ីស្រាអែលនៅតែបន្តវាយប្រហារនៅទូទាំងតំបន់ហ្កាហ្សា ដោយបានសម្លាប់មនុស្សយ៉ាងហោចណាស់ ៧១៥នាក់ ចាប់តាំងពីបទឈប់បាញ់ចូលជាធរមានកាលពីថ្ងៃទី១០ ខែតុលាឆ្នាំមុន៕