ប្រធានាធិបតីអ៊ុយក្រែន លោក Volodymyr Zelenskyy បានសម្តែងការព្រួយបារម្ភជាថ្មីទៀតថា ការអូសបន្លាយសង្គ្រាមកាន់តែដ៏យូររវាងសហរដ្ឋអាមេរិក និងអ៊ីស្រាអែល លើអ៊ីរ៉ង់អាចប៉ះពាល់ដល់គាំទ្ររបស់អាមេរិកចំពោះអ៊ុយក្រែនបន្ថែមទៀត ខណៈអាទិភាពជាសកលរបស់ទីក្រុងវ៉ាស៊ីនតោនផ្លាស់ប្តូរ ហើយទីក្រុងគីវកំពុងត្រៀមខ្លួនសម្រាប់ការកាត់បន្ថយការដឹកជញ្ជូនមីស៊ីលការពារដែនអាកាស Patriot ដែលត្រូវការចាំបាច់។

លោក Zelenskyy បាននិយាយទៅកាន់សារព័ត៌មាន AP ក្នុងបទសម្ភាសន៍ផ្តាច់មុខមួយកាលពីចុងសប្ដាហ៍នេះ នៅទីក្រុងអ៊ីស្តង់ប៊ុល ប្រទេសទួរគី ថា អ៊ុយក្រែនត្រូវការប្រព័ន្ធការពារដែនអាកាស Patriot បន្ថែមទៀតដែលផលិតដោយសហរដ្ឋអាមេរិក ដើម្បីជួយទប់ទល់នឹងការវាយប្រហារប្រចាំថ្ងៃរបស់រុស្ស៊ី។

ការវាយប្រហារឥតឈប់ឈររបស់រុស្ស៊ីលើតំបន់ទីក្រុងនៅពីក្រោយសមរភូមិ បន្ទាប់ពីការវាយប្រហារទ្រង់ទ្រាយធំលើអ៊ុយក្រែនជាងបួនឆ្នាំមុន បានសម្លាប់ជនស៊ីវិលរាប់ពាន់នាក់។ រុស្ស៊ី ក៏បានកំណត់គោលដៅការផ្គត់ផ្គង់ថាមពលរបស់អ៊ុយក្រែន ដើម្បីរំខានដល់ការផលិតឧស្សាហកម្មយានដ្រូន និងមីស៊ីលដែលទើបបង្កើតថ្មីៗរបស់អ៊ុយក្រែន ខណៈក៏ធ្វើឲ្យជនស៊ីវិលខ្វះកម្ដៅ និងទឹកប្រើប្រាស់ក្នុងរដូវរងាផងដែរ។

លោក Zelenskyy បាននិយាយថា ពួកលោកត្រូវទទួលស្គាល់ថា សព្វថ្ងៃនេះ អ៊ុយក្រែនមិនមែនជាអាទិភាពទៀតទេ។ នោះហើយជាមូលហេតុដែលរូបលោកខ្លាចថាសង្គ្រាម អ៊ីរ៉ង់ដែលនៅតែអូសបន្លាយនឹងផ្តល់ឱ្យពួកលោកនូវការគាំទ្រតិចជាងមុន។គួរឲ្យដឹងថានេះមិនមែនជាលើកទី១ទេដែលមេដឹកនាំអ៊ុយក្រែនរូបនេះត្អូញត្អែរពីការបាត់បង់ការគាំទ្រពីអាមេរិក៕