មន្ត្រីម្នាក់ដែលត្រូវបានលើកបន្តុបដោយរុស្ស៊ី បាននិយាយកាលពីថ្ងៃអាទិត្យ ទី៥ ខែមេសា នាវាដឹកទំនិញមួយគ្រឿងដែលផ្ទុកស្រូវសាលី បានលិចនៅសមុទ្រ Azov បន្ទាប់ពីរងការវាយប្រហារដោយយានដ្រូនរបស់អ៊ុយក្រែន ខណៈរបាយការណ៍ដាច់ដោយឡែក បានបង្ហាញពីការរំខាននៅបន្តចំពោះហេដ្ឋារចនាសម្ព័ន្ធនាំចេញប្រេងរបស់រុស្ស៊ី។

លោក Vladimir Saldo ប្រមុខតំបន់ Kherson របស់អ៊ុយក្រែនដែលគ្រប់គ្រងដោយរុស្ស៊ី ត្រូវបានតែងតាំងដោយទីក្រុងមូស្គូ បាននិយាយថា ហេតុការណ៍នេះបានកើតឡើងកាលពីថ្ងៃសុក្រសប្តាហ៍មុន ប៉ុន្តែទើបតែត្រូវបានគេដឹងកាលពីថ្ងៃអាទិត្យបន្ទាប់ពីអ្នកនៅរស់រានជីវិត បានទៅដល់ឆ្នេរ។ លោក បានចោទប្រកាន់អ៊ុយក្រែនថា បានធ្វើ «ការវាយប្រហារភេរវកម្ម» លើនាវា ទោះបីជាទីក្រុងគីវ មិនបានធ្វើអត្ថាធិប្បាយក៏ដោយ។

លោក Saldo បាននិយាយថា នាវាដែលត្រូវបានគេកំណត់អត្តសញ្ញាណថាជានា Volgo-Balt បានលិចបន្ទាប់ពីការវាយប្រហារ ដោយបង្ខំឱ្យក្រុមនាវិក បោះបង់ចោលនាវា។

សមាជិកនាវិកចំនួន៩នាក់ ដែលសុទ្ធតែជាជនជាតិរុស្ស៊ី ក្រោយមកត្រូវបានគេរកឃើញថានៅមានជីវិតរស់ នៅជិតភូមិ Strilkove ក្នុងតំបន់ Kherson។ ជំនួយការម្នាក់របស់កាពីទែននាវា ត្រូវបានសម្លាប់ និងពីរនាក់ទៀតបានបាត់ខ្លួន ខណៈកាពីទែននាវា កំពុងសម្រាកព្យាបាលនៅមន្ទីរពេទ្យ។លោក Saldo បាននិយាយថា «នេះពុំមែនជាករណីដំបូងដែលអ៊ុយក្រែនបានវាយប្រហារលើនាវាដឹកទំនិញនៅក្នុងដែនទឹកអព្យាក្រឹតនោះទេ ហើយនឹងមានការឆ្លើយតបចំពោះឧក្រិដ្ឋកម្មនេះ»។

ដោយឡែក កំពង់ផែបាល់ទិកដ៏សំខាន់របស់រុស្ស៊ី Ust-Luga បានបន្តការផ្ទុកប្រេងឆៅឡើងវិញបន្ទាប់ពីការរំខានជាច្រើនថ្ងៃដែលបណ្តាលមកពីការវាយប្រហារដោយយានដ្រូនរបស់អ៊ុយក្រែន នេះបើយោងតាមការចេញផ្សាយរបស់សារព័ត៌មាន Bloomberg News។