អវកាសយានិកនៅក្នុងបេសកកម្មភពព្រះចន្ទដ៏ប្រវត្តិសាស្ត្រ Artemis II របស់អង្គការណាសា ត្រូវបានរំពឹងថា នឹងទៅដល់ចំហៀងឆ្ងាយនៃឋានព្រះចន្ទនៅថ្ងៃចន្ទ ទី៦ ខែមេសា នេះ ដែលជាដំណើរចូលទៅក្នុងលំហអាកាសកាន់តែជ្រៅជាងអ្វីដែលមនុស្សជាតិមិនធ្លាប់ទៅដល់នោះទេនាពេលកន្លងមក។

អង្គការណាសា បានរាយការណ៍ពីវឌ្ឍនភាពយ៉ាងល្អនៃការហោះក្រឡឹងជុំវិញព្រះចន្ទ ចាប់តាំងពី បេសកកម្មដែលមានរយៈពេលប្រហែល ១០ថ្ងៃនេះ បានចាប់ផ្ដើមកាលពីថ្ងៃពុធសប្ដាហ៍មុនមក ដោយក្នុងនោះមានអវកាសយានិកជនជាតិអាមេរិក ៣រូប និងជនជាតិកាណាដាមួយរូប កំពុងតែត្រៀមបំបែកកំណត់ត្រាចម្ងាយឆ្ងាយបំផុតពីភពផែនដី ស្របពេលដែលបាតុភូតសូរ្យគ្រាសពេញវង់ជិតមកដល់។

អវកាសយានិកបានរាយការណ៍បន្ទាប់ពីយាន Artemis បានបញ្ឆេះម៉ាស៊ីនផ្ដាច់ខ្លួនចេញពីយានជំរុញដ៏សំខាន់ដើម្បីចាកចេញពីគន្លងតារាវិថីរបស់ផែនដីថា៖ «ផែនដីមើលទៅតូចណាស់ ហើយព្រះចន្ទពិតជាកំពុងរីកធំទៅៗ»។ ក្រុម Artemis II គឺជាក្រុមអវកាសយានិកដំបូងគេដែលធ្វើដំណើរឆ្ពោះទៅកាន់ព្រះចន្ទ ក្នុងរយៈពេលជាងកន្លះសតវត្សមកនេះ ដោយបន្តដំណើរពីកម្មវិធី អាប៉ូឡូ ដែលបានបញ្ចប់ទៅកាលពីឆ្នាំ១៩៧២។

ទោះបីជាបេសកកម្មនេះកំពុងបញ្ជូនទិន្នន័យ និងរូបភាពដ៏មានតម្លៃមកផែនដីវិញក៏ដោយ ក៏ក្រុមអវកាសយានិកបានរាយការណ៍ពីបញ្ហាដែលកើតមានដដែលៗ ទាក់ទងនឹងឧបករណ៍ដ៏សំខាន់បំផុតមួយនៃកន្សោមយាន Orion នោះគឺ៖ បង្គន់អនាម័យ។ បង្គន់អនាម័យនៅក្នុងបេសកកម្ម Artemis II នេះ ធ្លាប់ត្រូវបានសាកល្បងនៅលើស្ថានីយអវកាសអន្តរជាតិ (ISS) កាលពីប៉ុន្មានឆ្នាំមុនរួចមកហើយ ប៉ុន្តែនៅតែងាយនឹងជួបប្រទះបញ្ហាមិនដំណើរការដដែល៕