ប្រធានាធិបតីកូរ៉េខាងត្បូង លោក Lee Jae Myung នៅថ្ងៃចន្ទ (៦ មេសា) នេះ បានសម្តែងការសោកស្តាយទៅកាន់កូរ៉េខាងជើង ចំពោះឧប្បត្តិហេតុដែលយានដ្រូនជ្រៀតចូលដែនអាកាសរបស់កូរ៉េខាងជើង ជាហេតុការណ៍ដែលលោកបាននិយាយថា ត្រូវបានធ្វើឡើងដោយបុគ្គលកូរ៉េខាងត្បូងមួយរូប ដោយពុំមានការអនុញ្ញាតពីរដ្ឋាភិបាលនោះទេ ដោយសង្កត់ធ្ងន់លើការប្តេជ្ញាចិត្តរបស់ទីក្រុងសេអ៊ូល ក្នុងការទប់ស្កាត់ឧប្បត្តិហេតុបែបនេះនាពេលអនាគត។

នៅក្នុងកិច្ចប្រជុំគណៈរដ្ឋមន្ត្រី លោក Lee បាននិយាយថា៖ «ទោះបីជារឿងនេះមិនមែនជាចេតនារបស់រដ្ឋាភិបាលកូរ៉េខាងត្បូងក៏ដោយ ក៏ទីក្រុងសេអ៊ូលសូមសម្តែងការសោកស្តាយទៅកាន់កូរ៉េខាងជើង ចំពោះការពិតដែលថា ភាពតានតឹងផ្នែកយោធាដែលមិនចាំបាច់នេះ ត្រូវបានបង្កឡើងដោយសកម្មភាពមិនទទួលខុសត្រូវ និងមិនប្រុងប្រយ័ត្នរបស់បុគ្គលមួយចំនួន»។

លោក Lee បាននិយាយទៀតថា ការស៊ើបអង្កេតរបស់អាជ្ញាធរកូរ៉េខាងត្បូងរកឃើញថា បុគ្គលិកផ្នែកចារកម្មសម្ងាត់ជាតិ (NIS) និងមន្ត្រីយោធាកំពុងបំពេញកាតព្វកិច្ចមួយរូប ក៏មានជាប់ពាក់ព័ន្ធនឹងករណីនេះ ដោយបន្ថែមថា រដ្ឋធម្មនុញ្ញហាមឃាត់សកម្មភាពញុះញង់របស់បុគ្គល ប្រឆាំងនឹងកូរ៉េខាងជើង។

គួររម្លឹកថា កាលពីខែមករា ទីក្រុងព្យុងយ៉ាងបាននិយាយថា យានដ្រូនដែលបញ្ជូនពីកូរ៉េខាងត្បូង បានរំលោភលើដែនអាកាសរបស់ខ្លួន ដោយចោទទីក្រុងសេអ៊ូល ថាបង្កការញុះញង់យ៉ាងធ្ងន់ធ្ងរ និងនិយាយថា ខ្លួនបានបាញ់ទម្លាក់ដ្រូនទាំងនោះ។ កូរ៉េខាងត្បូងបានបដិសេធការជាប់ពាក់ព័ន្ធខាងយោធាណាមួយ ហើយបានបើកការស៊ើបអង្កេតរួមគ្នារវាងយោធា និងនគរបាល នៅក្នុងហេតុការណ៍នេះ៕