នគរបាលអង់គ្លេស បានចាប់ខ្លួនមនុស្ស៧នាក់សង្ស័យថាគាំទ្រអង្គការ Palestine Action ដែលត្រូវបានហាមឃាត់ក្នុងការតវ៉ានៅជិតមូលដ្ឋានទ័ពអាកាសរបស់កងទ័ពអាកាសអង់គ្លេស(RAF)ភាគខាងកើតប្រទេសអង់គ្លេសដែលត្រូវបានប្រើប្រាស់ដោយកងកម្លាំងសហរដ្ឋអាមេរិក។

បុរស៥នាក់ និងស្ត្រី២នាក់ ដែលត្រូវបានចាប់ខ្លួននៅជំរំសន្តិភាព នៅខាងក្រៅមូលដ្ឋានទ័ពអាកាស Lakenheath បានប្រមូលផ្តុំគ្នាជាមួយសកម្មជនផ្សេងទៀតកាលពីថ្ងៃអាទិត្យដើម្បីតវ៉ាប្រឆាំងការប្រើប្រាស់មូលដ្ឋាននេះជាចំណុចចេញដំណើរសម្រាប់យន្តហោះអាមេរិកដែលពាក់ព័ន្ធក្នុងសង្គ្រាមអាមេរិក-អ៊ីស្រាអែល លើប្រទេសអ៊ីរ៉ង់។

សម្ព័ន្ធ Lakenheath ដើម្បីសន្តិភាព ដែលបានរៀបចំការតវ៉ា បាននិយាយថា មនុស្សទាំង៧នាក់ត្រូវបានចាប់ខ្លួនដោយស្លៀកពាក់សម្លៀកបំពាក់មានសារថា «យើងប្រឆាំងការប្រល័យពូជសាសន៍ យើងគាំទ្រ Palestine Action »។ នគរបាលបាននិយាយថា អ្នកតវ៉ាជាច្រើនត្រូវបានចាប់ខ្លួន «ដោយសង្ស័យថាគាំទ្រអង្គការដែលត្រូវបានហាមឃាត់មួយនេះ»។ រដ្ឋាភិបាលការងាររបស់នាយករដ្ឋមន្ត្រី លោក Keir Starmer បានហាមឃាត់អង្គការ Palestine Action ថាជាអង្គការ «ភេរវកម្ម» កាលពីឆ្នាំមុន ដែលធ្វើឱ្យវាក្លាយជាបទល្មើសព្រហ្មទណ្ឌក្នុងការចូលរួម ឬគាំទ្រក្រុមនេះ។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានស្តីបន្ទោសលោក Starmer ចំពោះអ្វីដែលលោកហៅថា គាំទ្រមិនគ្រប់គ្រាន់នៅក្នុងសង្គ្រាមអាមេរិក-អ៊ីស្រាអែល លើអ៊ីរ៉ង់ ដែលធ្វើឱ្យសម្ព័ន្ធមិត្តយូរអង្វែងរបស់ប្រទេសទាំងពីរជួបភាពតានតឹង។

ចក្រភពអង់គ្លេស បានអនុញ្ញាតឱ្យសហរដ្ឋអាមេរិកប្រើប្រាស់មូលដ្ឋានយោធារបស់ខ្លួនដើម្បីធ្វើប្រតិបត្តិការ «ការពារ» ប្រឆាំងនឹងអ៊ីរ៉ង់ និងការពារច្រកសមុទ្រ Hormuz ដ៏សំខាន់ ដែលតាមរយៈនេះ ប្រហែល ២០ភាគរយនៃប្រេងរបស់ពិភពលោក ឆ្លងកាត់ក្នុងពេលសន្តិភាព។