ការវាយប្រហាររបស់អ៊ីស្រាអែលនៅទូទាំងភាគខាងត្បូងប្រទេសលីបង់ និងរដ្ឋធានីបេរូត បានសម្លាប់មនុស្សយ៉ាងហោចណាស់១៤នាក់ មួយថ្ងៃបន្ទាប់ពីអ៊ីស្រាអែល បានគំរាមវាយប្រហារច្រកព្រំដែនសំខាន់របស់ប្រទេសលីបង់ជាមួយប្រទេសស៊ីរី ដោយបង្ខំឱ្យបិទច្រកនេះ។

ការវាយប្រហាររបស់អ៊ីស្រាអែល នៅជាយក្រុងភាគខាងត្បូងទីក្រុងបេរូតកាលពីថ្ងៃអាទិត្យ បានសម្លាប់មនុស្សយ៉ាងហោចណាស់ ៤ នាក់ ខណៈមនុស្ស ១០ នាក់ផ្សេងទៀត រួមទាំងគ្រួសារមួយមានសមាជិក ៦ នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅភាគខាងត្បូងប្រទេសលីបង់។

យោងតាមក្រសួងសុខាភិបាលសាធារណៈលីបង់បានឲ្យដឹងថា មនុស្ស ៣៩ នាក់ទៀតបានរងរបួសនៅក្នុងការវាយប្រហាររបស់អ៊ីស្រាអែលទៅលើសង្កាត់ Jnah របស់ទីក្រុងបេរូត។ ប្រភពព័ត៌មានពីក្រុមសវេជ្ជសាស្ត្របានប្រាប់ទីភ្នាក់ងារសារព័ត៌មាន AFPថា ការវាយប្រហារ បានធ្លាក់ក្នុងចម្ងាយប្រហែល ១០០ ម៉ែត្រ ពីមន្ទីរពេទ្យសាកលវិទ្យាល័យ Rafik Hariri ជាមណ្ឌលសុខភាពសាធារណៈធំបំផុតរបស់ប្រទេស ។

អ៊ីស្រាអែល បានបើកការវាយប្រហារតាមអាកាសនៅទូទាំងប្រទេសលីបង់ចាប់តាំងពីថ្ងៃទី ២ ខែមីនា បន្ទាប់ពីក្រុមប្រដាប់អាវុធលីបង់ហេសបូឡា បានបាញ់រ៉ូកែតចូលទៅក្នុងប្រទេសអ៊ីស្រាអែលក្នុងការឆ្លើយតបទៅនឹងសង្គ្រាមរបស់សហរដ្ឋអាមេរិក-អ៊ីស្រាអែល លើអ៊ីរ៉ង់។ កងកម្លាំងអ៊ីស្រាអែល ក៏បានចាប់ផ្តើមការឈ្លានពានជើងគោកនៅភាគខាងត្បូងប្រទេសលីបង់។

កាលពីថ្ងៃអាទិត្យ ក្រុមហេសបូឡាបានអះអាងថា បានបាញ់មីស៊ីលស៊ីបគោលដៅមួយគ្រាប់ទៅលើនាវាចម្បាំងអ៊ីស្រាអែលមួយគ្រឿងនៅចម្ងាយ១២៦គីឡូម៉ែត្រ ពីឆ្នេរសមុទ្រលីបង់។ ប៉ុន្តែ គ្មានការអត្ថាធិប្បាយភ្លាមៗពីយោធាអ៊ីស្រាអែលទេ។