អ៊ីស្រាអែលកំពុងរៀបចំបង្កើនការវាយប្រហាររបស់ខ្លួនលើអ៊ីរ៉ង់ ប្រសិនបើការចរចាដោយប្រយោលរវាងសហរដ្ឋអាមេរិក និងអ៊ីរ៉ង់បរាជ័យ។ នេះបើយោងតាមការចុះផ្សាយរបស់ទូរទស្សន៍រដ្ឋអ៊ីស្រាអែល Kan TV កាលពីថ្ងៃអាទិត្យ។

ដោយដកស្រង់សម្តីមន្ត្រីអ៊ីស្រាអែល ទូរទស្សន៍ Kan TV បានរាយការណ៍ថា អ៊ីស្រាអែលជឿជាក់ថា ប្រធានាធិបតីអាមេរិក លោក ដូណាល់ ត្រាំ នឹងផ្តល់ភ្លើងខៀវ ដើម្បីកំណត់គោលដៅរោងចក្រថាមពល និងហេដ្ឋារចនាសម្ព័ន្ធជាតិ នៅក្នុងប្រទេសអ៊ីរ៉ង់ ហើយកំពុងរង់ចាំ «ការយល់ព្រមចុងក្រោយ»។ 

នៅថ្ងៃអាទិត្យផងដែរនោះ មេបញ្ជាការយោធាអ៊ីស្រាអែល លោក Eyal Zamir បានទៅពិនិត្យមើលស្ថានភាព នៅភាគខាងត្បូងប្រទេសលីបង់ ហើយបាននិយាយថា អ៊ីស្រាអែលមានផែនការបង្កើនការវាយប្រហាររបស់ខ្លួនប្រឆាំងនឹងក្រុមហេសបូឡា។

លោក Zamir បានអះអាងថា ជនសកម្មប្រយុទ្ធហេសបូឡាជាង ១.000នាក់ ត្រូវបានសម្លាប់ ចាប់តាំងពីជម្លោះទ្រង់ទ្រាយធំ បានបន្តឡើងវិញ។ លោកបាននិយាយថា៖ «ចំនួននោះ នឹងបន្តកើនឡើង។ ការខូចខាតដល់ក្រុមហេសបូឡា នឹងកាន់តែខ្លាំងឡើង»។

ការវិវត្តទាំងនេះ កើតឡើង ចំពេលមានភាពតានតឹងក្នុងតំបន់កាន់តែខ្លាំងឡើង បន្ទាប់ពីការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ ដែលចាប់ផ្តើមនៅថ្ងៃទី ២៨ ខែកុម្ភៈ ដែលអ៊ីរ៉ង់ និងសម្ព័ន្ធមិត្តក្នុងតំបន់របស់ខ្លួន បានឆ្លើយតបដោយការវាយប្រហារលើផលប្រយោជន៍អ៊ីស្រាអែល និងសហរដ្ឋ      អាមេរិក នៅទូទាំងមជ្ឈិមបូព៌ា។

ការប្រយុទ្ធគ្នាឆ្លងកាត់ព្រំដែន បានបន្តតាមបណ្តោយព្រំដែនលីបង់-អ៊ីស្រាអែល ចាប់តាំងពីថ្ងៃទី ០២ ខែ   មីនា នៅពេលដែលក្រុមហេសបូឡា បានបាញ់រ៉ូកែតឆ្ពោះទៅកាន់អ៊ីស្រាអែលជាលើកដំបូង ចាប់តាំងពីបទឈប់បាញ់ចូលជាធរមាន នៅថ្ងៃទី ២៧ ខែវិច្ឆិកា ឆ្នាំ ២០២៤ ដែលបង្កឲ្យមានការវាយប្រហារតាមអាកាសរបស់អ៊ីស្រាអែលកាន់តែខ្លាំងឡើង នៅទូទាំងភាគខាងត្បូង និងខាងកើតប្រទេសលីបង់៕