អេមីរ៉ាតអារ៉ាប់រួម និងគូវ៉ែត បាននិយាយនៅថ្ងៃចន្ទនេះថា ប្រព័ន្ធការពារដែនអាកាសរបស់ពួកគេ កំពុងចូលរួមយ៉ាងសកម្មដើម្បីទប់ទល់នឹងមីស៊ីល និងយានដ្រូនរបស់អ៊ីរ៉ង់ ខណៈដែលរដ្ឋឈូងសមុទ្រ បានត្រៀមខ្លួនសម្រាប់ការវាយប្រហារមួយថ្ងៃទៀតដែលកំណត់គោលដៅលើទឹកដីរបស់ពួកគេ។

ក្រសួងការពារជាតិអារ៉ាប់រួម បាននិយាយថា ប្រព័ន្ធការពារដែនអាកាសរបស់ពួកគេ កំពុង “ចូលរួមយ៉ាងសកម្មក្នុងការប្រឆាំងនឹងមីស៊ីល និងការគំរាមកំហែងពីយានដ្រូន ដោយបន្ថែមថា សំឡេងដែលបានឮនៅទូទាំងប្រទេស គឺជាលទ្ធផលនៃប្រតិបត្តិការស្ទាក់ចាប់ដែលកំពុងបន្ត។

កងទ័ពកូវ៉ែត បាននិយាយថា កងកម្លាំងរបស់ខ្លួន កំពុងឆ្លើយតបទៅនឹង «ការគំរាមកំហែងពីមីស៊ីល និងយានដ្រូនអរិភាព» រយៈពេលប៉ុន្មានម៉ោងបន្ទាប់ពីប្រទេសនេះ បានប្រឈមនឹងការវាយប្រហារស្រដៀងគ្នានេះនៅពេលចាប់ពីថ្ងៃអាទិត្យ ដល់ថ្ងៃចន្ទ។

ការវាយប្រហារជាបន្តបន្ទាប់គ្នានេះ គឺជាការកើនឡើងចុងក្រោយបំផុតនៅក្នុងយុទ្ធនាការរយៈពេលមួយ  សប្តាហ៍របស់អ៊ីរ៉ង់ប្រឆាំងនឹងរដ្ឋឈូងសមុទ្រ ដែលបានចាប់ផ្តើមជាការឆ្លើយតបទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល ដែលបានចាប់ផ្តើមនៅចុងខែកុម្ភៈ។

កាលពីថ្ងៃអាទិត្យ យានដ្រូននិងមីស៊ីលរបស់អ៊ីរ៉ង់ បានបង្កឲ្យមានអគ្គិភ័យនៅរោងចក្រគីមីឥន្ធនៈមួយ នៅក្នុងទីក្រុងឧស្សាហកម្ម Ruwais របស់អារ៉ាប់រួម និងបានវាយប្រហារគោលដៅថាមពល និងរដ្ឋាភិបាលជាច្រើន នៅក្នុងប្រទេសកូវ៉ែត៕