អគ្គមេបញ្ជាការអ៊ុយក្រែន លោក Oleksandr Syrskyi បាននិយាយកាលពីថ្ងៃអាទិត្យ (៥ មេសា) ថា កងកម្លាំងរបស់ទីក្រុងគីវ បានដណ្តើមយកមកវិញនូវការគ្រប់គ្រងលើទីតាំងលំនៅចំនួន ១២កន្លែង ចាប់តាំងពីចុងខែមករា ឆ្នាំ២០២៦នេះមក។

លោក Syrskyi បន្តថា កងកម្លាំងអ៊ុយក្រែន វាយដណ្តើមបានទឹកដីទំហំ ៤៨០ គីឡូម៉ែត្រក្រឡាមកវិញ រួមទាំងទីតាំងឈរជើង ៨កន្លែង នៅក្នុងតំបន់ Dnipropetrovsk និង ៤កន្លែងទៀត ក្នុងតំបន់ Zaporizhzhia។

មន្រ្តីយោធាជាន់ខ្ពស់អ៊ុយក្រែនរូបនេះបានចោទរុស្ស៊ីថា នៅតែបន្តការវាយប្រហារយ៉ាងខ្លាំងក្លាក្នុងទិសសមរភូមិ Oleksandrivka រួមទាំងនៅតំបន់ Ternove ជាដើម។

លោក Syrskyi សង្កត់ធ្ងន់ថា រុស្ស៊ីបានធ្វើការវាយប្រហាររាប់សិបដងក្នុងទិសដៅនោះ ក្នុងពេលមួយសប្តាហ៍កន្លងមកនេះ ដោយចោទប្រកាន់ថា ទីក្រុងមូស្គូ មានបំណងដណ្តើមយកទឹកដីអ៊ុយក្រែនបន្ថែមទៀត និងបង្កើត «តំបន់ទ្រនាប់» នៅក្នុងតំបន់ Dnipropetrovsk។

វិទ្យាស្ថានសិក្សាសង្គ្រាម ដែលមានមូលដ្ឋាននៅសហរដ្ឋអាមេរិក បាននិយាយថា គោលបំណងនៃការវាយលុករបស់រុស្ស៊ី ចូលទៅក្នុងតំបន់ Dnipropetrovsk ប្រហែលជាដើម្បីកាត់ផ្តាច់ខ្សែទំនាក់ទំនង និងការផ្គត់ផ្គង់របស់អ៊ុយក្រែន ទៅកាន់កងទ័ពរបស់ខ្លួនក្នុងតំបន់ Donetsk នៅចុងភាគខាងកើត៕