ប្រតិបត្តិការយោធានៅអ៊ីរ៉ង់ បានធ្វើឲ្យសហរដ្ឋអាមេរិកចំណាយជាង ៤២,១ ពាន់លានដុល្លារ ក្នុងរយៈពេល ៣៧ថ្ងៃនៃការប្រយុទ្ធគ្នានេះ។ នេះបើយោងតាមគេហទំព័រព័ត៌មានតាមដានការចំណាយសម្រាប់  សង្គ្រាមនៅអ៊ីរ៉ង់ (Iran War Cost Tracker)។

ការតាមដានពេលវេលាជាក់ស្តែងរបស់គេហទំព័រនេះ គឺផ្អែកលើសន្និសីទរបស់មន្ទីរបញ្ចកោណអំពីប្រតិបត្តិការយោធាសម្រាប់សភាអាមេរិក នៅថ្ងៃទី ១០ ខែមីនា ដែលបានបញ្ជាក់ថា ទីក្រុងវ៉ាស៊ីនតោន បានចំណាយប្រាក់ ១១,៣ ពាន់លានដុល្លារ ក្នុងរយៈពេល ៦ថ្ងៃដំបូងនៃអរិភាពនៅមជ្ឈិមបូព៌ា ហើយមានគម្រោងចំណាយបន្ថែម ១ ពាន់លានដុល្លារជារៀងរាល់ថ្ងៃសម្រាប់ជម្លោះនេះ។

សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងធំៗរបស់អ៊ីរ៉ង់ រួមទាំងទីក្រុងតេអេរ៉ង់ ត្រូវបានវាយប្រហារ។ កងឆ្មាំបដិវត្តន៍ឥស្លាមអ៊ីរ៉ង់ (IRGC) បានបើកការវាយប្រហារសងសឹកប្រឆាំងនឹងអ៊ីស្រាអែល និងមូលដ្ឋានយោធាអាមេរិកនៅប្រទេសបារ៉ែន ហ្ស៊កដានី អ៊ីរ៉ាក់ កាតា កូវ៉ែត អេមីរ៉ាតអារ៉ាប់រួម និងអារ៉ាប៊ីសាអ៊ូឌីត៕