ប្រភពមួយដែលដឹងពីសំណើនេះ បាននិយាយថ្ងៃចន្ទនេះថា អ៊ីរ៉ង់ និងសហរដ្ឋអាមេរិក បានទទួលផែនការ ដើម្បីបញ្ចប់អរិភាព ដែលអាចចូលជាធរមាន នៅថ្ងៃនេះ និងបើកច្រកសមុទ្រហ័រមូសឡើងវិញ។ 

ប្រភពនេះ បានបញ្ជាក់ថា ក្របខណ្ឌមួយដើម្បីបញ្ចប់អរិភាព ត្រូវបានដាក់បញ្ចូលគ្នាដោយប៉ាគីស្ថាន និងបានផ្លាស់ប្តូរទស្សនៈជាមួយអ៊ីរ៉ង់ និងសហរដ្ឋអាមេរិកពេញមួយយប់ ដោយគូសបញ្ជាក់ពីវិធីសាស្រ្តពីរកម្រិត ជាមួយនឹងការឈប់បាញ់ជាបន្ទាន់មួយ បន្ទាប់ពីមានកិច្ចព្រមព្រៀងដ៏ទូលំទូលាយ។

ប្រភព បាននិយាយថា៖«ធាតុផ្សំទាំងអស់ ត្រូវតែព្រមព្រៀងគ្នានៅថ្ងៃនេះ» ដោយបន្ថែមថា ការយោគយល់គ្នាដំបូង នឹងត្រូវបានរៀបចំឡើងជាអនុស្សរណៈនៃការយោគយល់គ្នាដែលបានបញ្ចប់តាមប្រព័ន្ធ   អេឡិចត្រូនិក តាមរយៈប៉ាគីស្ថាន ដែលជាបណ្តាញទំនាក់ទំនងតែមួយគត់ នៅក្នុងកិច្ចចរចានេះ។

ដោយដកស្រង់ប្រភពពីសហរដ្ឋអាមេរិក អ៊ីស្រាអែល និងក្នុងតំបន់ គេហទំព័រព័ត៌មាន Axios បានរាយការណ៍ជាលើកដំបូងនៅថ្ងៃអាទិត្យថា សហរដ្ឋអាមេរិក អ៊ីរ៉ង់ និងអ្នកសម្របសម្រួលក្នុងតំបន់ កំពុងពិភាក្សាអំពីបទឈប់បាញ់រយៈពេល ៤៥ថ្ងៃ ដែលអាចធ្វើទៅបានជាផ្នែកមួយនៃកិច្ចព្រមព្រៀងពីរដំណាក់កាល ដែលអាចនាំទៅដល់ការបញ្ចប់សង្គ្រាមជាអចិន្ត្រៃយ៍។ 

ប្រភពដដែល បានប្រាប់សារព័ត៌មានរ៉យទ័រថា មេបញ្ជាការកងទ័ពប៉ាគីស្ថាន លោកសេនាប្រមុខ Asim Munir បានទាក់ទងគ្នា «ពេញមួយយប់» ជាមួយអនុប្រធានាធិបតីអាមេរិក លោក JD Vance បេសកជនពិសេស Steve Witkoff និងរដ្ឋមន្ត្រីការបរទេសអ៊ីរ៉ង់ លោក Abbas Araqchi៕