ភ្នំពេញ៖ រសៀលថ្ងៃទី១ ខែមេសានេះ ឯកអគ្គរដ្ឋទូតឥណ្ឌាប្រចាំកម្ពុជា បានចុះហត្ថលេខាលើអនុសារណៈជាមួយក្រសួងទេសចរណ៍ ដើម្បីផ្តល់ហិរញ្ញប្បទានអនុវត្តគម្រោងអភិវឌ្ឍន៍ទេសចរណ៍ចំនួន៣ ជំរុញអភិវឌ្ឍន៍ផលិតផលទេសចរណ៍សហគមន៍ និងផ្សព្វផ្សាយគោលដៅទេសចរណ៍ទាំងអស់របស់កម្ពុជា ទៅកាន់មជ្ឈដ្ឋានជាតិអន្តរជាតិ។

បើតាមលោក ជុក ជំនោរ ប្រធាននាយកដ្ឋានអភិវឌ្ឍន៍ទេសចរណ៍ ក្រសួងទេសចរណ៍ បានថ្លែងថា នៅក្នុងគម្រោងទាំងបីដែលរដ្ឋាភិបាលឥណ្ឌាគាំទ្រជួយអភិវឌ្ឍន៍ទេសចរណ៍កម្ពុជានោះ រួមមាន៖ គម្រោងលើកកម្ពស់សកម្មភាពអេកូទេសចរណ៍នៅសហគមន៍អេកូទេសចរណ៍ផាត់សណ្តាយខេត្តកំពង់ធំ នៅបឹងស្នេហ៍ខេត្តព្រៃវែង ហើយក្នុងគម្រោងនឹងរៀបចំធ្វើផ្សារបណ្តែតទឹក រៀបចំ​បឹងហ្គាណូ​បណ្តែត​ទឹកជាដើម ​។

ដោយឡែកគម្រោងបង្កើតកម្មវិធីទូរស័ព្ទ app store ​ផ្សព្វផ្សាយគោលដៅ​ទេសចរណ៍​ទាំងអស់​ ដើម្បីបង្កលក្ខណៈអោយភ្ញៀវទេសចរជាតិអន្តរជាតិងាយស្រួលដល់ការកក់ និងស្វែងរកគោលដៅទេសចរណ៍កម្ពុជា ដើម្បីទៅលេងកម្សាន្តនៅទូទាំងប្រទេស។

ក្នុងពិធីចុះហត្ថលេខាលើអនុសារណៈយោគយល់គ្នានេះ ឯកឧត្តម ថោង ខុន រដ្ឋមន្ត្រី​ក្រសួង​ទេសចរណ៍ ថ្លែងអំណរគុណលោកជំទាវអគ្គរដ្ឋទូត ​ដែលបានខិតខំសម្របសម្រួល និងគាំទ្រ​លើ​សំណើទាំង៣របស់ក្រសួងទេសចរណ៍ ពាក់ព័ន្ធគម្រោង​ដែល​មាន​ឥទ្ធិពលលឿនរហូត​ទទួល​បានការ​ឯកភាពជាគោលការណ៍ពីក្រសួងការបរទេសនៃសារធារណៈរដ្ឋឥណ្ឌា ​ខណៈឯកឧត្តម រដ្ឋមន្ត្រីបានទន្ទឹងរងចាំចង់អោយគម្រោងទាំងនេះ ​សម្រេចបានជាស្ថាពរ និងមាន​ការ​អនុវត្ត​ជា​ផ្លូវការ​ដើម្បីអភិវឌ្ឍវិស័យទេសចរណ៍បន្តរីកចំរើនបន្ថែមទៀត។

ក្នុងជំនួបនេះ ឯកឧត្តម រដ្ឋមន្ត្រី បានថ្លែងថា កាលពីថ្ងៃទី១៧ ខែមីនា ឆ្នាំ២០២២ថ្មីៗនេះ រាជ​រដ្ឋាភិបាលបានសម្រេចបើកដំណើរការឡើងវិញ ការផ្តល់ទិដ្ឋការពេលមកដល់ (Visa on arrival) រួមជាមួយការលុបចោលកត្វកិច្ចនៃការធ្វើតេស្តរហ័ស (Rapid Test) ​និងការធ្វើតេស្ត PCR សម្រាប់ភ្ញៀវទេសចរអន្តរជាតិ​ដែលបានចាក់វ៉ាក់សាំងពេញលេញ។

ឯកឧត្តម ថោង ខុន បានស្នើលោកជំទាវអគ្គរដ្ឋទូតឥណ្ឌា​ សូមបន្តជួយគាំទ្រ និងជំរុញ​លំហូរ​ភ្ញៀវ​ទេសចរជនជាតិឥណ្ឌា​ មកកាន់កម្ពុជាបន្ថែមទៀត​ ខណៈដែលកម្ពុជា ​ពិសេសខេត្តសៀមរាប-អង្គរ​ជាគោលដៅទេសចរណ៍បែបសាសនា​ និងទេសចរណ៍ Honeymoon ដ៏ពេញ​និយម​សម្រាប់ជនជាតិឥណ្ឌា។

ឯកឧត្តម ក៏បានស្នើជំទាវអគ្គរដ្ឋទូតផងដែរ លើការជួយជំរុញបើកជើងហោះ​ត្រង់ពី​ឥណ្ឌា​មក​កាន់កម្ពុជា ​ដោយអាចចាប់ផ្តើមពី​ Charter Flight ​ជាមុនសិន។

ក្នុងពិធីនេះដែរ លោកជំទាវ Devyani Uttam Khobragade ឯកអគ្គរដ្ឋទូតឥណ្ឌាប្រចាំកម្ពុជា បាន​សន្យា​ នឹងបន្តផ្តល់ជំនួយហិរញ្ញប្បទាន​អនុវត្តលើគម្រោងផ្សេងៗទៀត ដែលស្នើឡើង​ដោយ​រដ្ឋមន្ត្រី​ក្រសួងទេសចរណ៍ ហើយលោកជំទាវទូតនឹង​ជម្រុញ​អោយក្រុមហ៊ុន​អាកាសចរណ៍​នៅ​ឥណ្ឌាតភ្ជាប់​ជើង​ហើរ​មកកម្ពុជា ។

លោកជំទាវ ថ្លែងថា នៅខណៈពេលនេះ​ជាពេលវេលាល្អបំផុត ដែល​ទេសចរឥណ្ឌា​គួរ​មកទស្សនា​កម្ពុជា ខណៈរាជរដ្ឋាភិបាលកម្ពុជា ​បានធ្វើការ​បន្ធូរបន្ថយ​លក្ខខ័ណ្ឌ​មក​ទស្សនាកម្ពុជា៕អត្ថបទ៖ ស៊ុម សុខជា