យ៉ាងហោចណាស់មនុស្ស ១៧នាក់ ត្រូវបានសម្លាប់នៅព្រឹកថ្ងៃចន្ទ (ទី៦ ខែមេសា ឆ្នាំ២០២៦) នេះ ក្នុងការវាយប្រហាររួមគ្នា រវាងសហរដ្ឋអាមេរិក និងអ៊ីស្រាអែល នៅក្នុងប្រទេសអ៊ីរ៉ង់។ នេះបើយោងតាមប្រព័ន្ធផ្សព្វផ្សាយក្នុងស្រុក។

បើយោងតាមទីភ្នាក់ងារសារព័ត៌មាន Mehr បានឲ្យដឹងថា អគារចំនួន ៣ខ្នង បានបាក់រលំ អំឡុងការវាយប្រហារមួយ នៅភាគខាងកើតនៃរដ្ឋធានីតេអេរ៉ង់ ហើយផ្ទះប្រហែល ៥០ខ្នង ត្រូវរងខូចខាត។ ទីភ្នាក់ងារសារព័ត៌មាននេះ បានបន្ថែមថា មនុស្ស ៤នាក់ បានបាត់បង់ជីវិត និង ៧នាក់រងរបួស នៅក្នុងការវាយប្រហារនេះ ហើយប្រតិបត្តិការស្វែងរក និងជួយសង្គ្រោះកំពុងបន្តមាន។

ចំណែកទីភ្នាក់ងារសារព័ត៌មាន Fars បានរាយការណ៍ថា យ៉ាងហោចណាស់មនុស្ស ១៣នាក់ ក៏ត្រូវបានសម្លាប់ផងដែរ នៅព្រឹកថ្ងៃចន្ទនេះ ដោយសារការវាយប្រហាររួមគ្នា រវាងសហរដ្ឋអាមេរិក និងអ៊ីស្រាអែលលើតំបន់ Baharestan ក្នុងខេត្តតេអេរ៉ង់របស់ប្រទេសអ៊ីរ៉ង់។

អភិបាលតំបន់ Baharestan បាននិយាយថា ការស្លាប់នេះបានកើតឡើងនៅពេលដែលកងកម្លាំងសហរដ្ឋអាមេរិក និងអ៊ីស្រាអែល បានទម្លាក់គ្រាប់បែកលើលំនៅឋានចំនួន ២ខ្នង នៅក្នុងទីក្រុង Qaleh Mir។ លោកបានកត់សម្គាល់ថា ការកាយសម្អាតកម្ទេចកម្ទី និងប្រតិបត្តិការស្វែងរក និងជួយសង្គ្រោះ តាមគំនរបាក់បែក កំពុងបន្តធ្វើ។

មិនមានសេចក្តីថ្លែងការណ៍ផ្លូវការណាមួយ ត្រូវបានចេញ ជុំវិញការខូចខាតបណ្តាលមកពីការវាយប្រហារ ដែលប្រព័ន្ធការពារដែនអាកាសត្រូវបានធ្វើការស្ទាក់ចាប់យ៉ាងសកម្ម៕