ការវាយប្រហាររបស់អ៊ីស្រាអែល បានសម្លាប់ប្រធានក្រុមចារកម្មកងឆ្មាំបដិវត្តន៍អ៊ីរ៉ង់ ស្របពេលនៅថ្ងៃចន្ទនេះ សាធារណរដ្ឋអ៊ិស្លាម ផ្គើនទៅនឹងការគំរាមកំហែងពីប្រធានាធិបតីសហរដ្ឋអាមេរិកលោក Donald Trump ថានឹងកម្ទេចហេដ្ឋារចនាសម្ព័ន្ធស៊ីវិល បើសិនជាទីក្រុងតេអេរ៉ង់មិនបើកច្រកសមុទ្រ Hormuz ឡើងវិញទេនោះ ។

ភាគីបង្កសង្រ្គាមនៅតែបន្តការវាយប្រហាររបស់ពួកគេ ក្នុងនោះមីស៊ីល និងយានដ្រូនអ៊ីរ៉ង់ មានគោលដៅលើអ៊ីស្រាអែល គូវ៉ែត និងអារ៉ាប់រួម ហើយអ៊ីស្រាអែល បានវាយប្រហារអ៊ីរ៉ង់ និងតំបន់ជាច្រើននៅលីបង់ ជាទីដែលពួកគេធ្វើសង្រ្គាមជាមួយក្រុមហេសបូឡាគាំទ្រអ៊ីរ៉ង់ ។

អ៊ីរ៉ង់និយាយថា ការវាយប្រហារខ្ទេចខ្ទាំច្រើនជាងនេះ នឹងកើតមាន បើសិនជាលោក Trumpធ្វើតាមការសន្យារបស់លោក ក្នុងការវាយប្រហារហេដ្ឋារចនាសម្ព័ន្ធស៊ីវិល ។

នៅក្នុងសារបង្ហោះលើបណ្តាញព័ត៌មានសង្គមកាលពីថ្ងៃអាទិត្យ មេដឹកនាំអាមេរិករូបនេះ បានគំរាមបំផ្លាញហេដ្ឋារចនាសម្ព័ន្ធស៊ីវិលអ៊ីរ៉ង់ បើសិនជាទីក្រុងតេអេរ៉ង់ មិនឱនក្បាលចំពោះការទាមទាររបស់លោកឲ្យបើកឡើងវិញការដឹកជញ្ជូនតំបន់ឈូងសមុទ្រនៅថ្ងៃអង្គារទេនោះ ។

អ៊ីរ៉ង់បានបិទច្រកសមុទ្រ Hormuz ស្ទើតែទាំងស្រុង ដែលជាផ្លូវឆ្លងកាត់ដ៏ចំាបាច់មួយសម្រាប់ថាមពល ធ្វើឲ្យតម្លៃប្រេង និងឧស្ម័នហក់ឡើងខ្ពស់ និងរុញច្រានឲ្យប្រទេសជាច្រើននៅជុំវិញពិភពលោកដាក់ចេញវិធានការ ដើម្បីទប់ស្កាត់ផលវិបាក ៕