អ្នកនាំពាក្យក្រសួងការបរទេស នៅថ្ងៃចន្ទ (ទី៦ ខែមេសា ឆ្នាំ២០២៦) នេះ បានលើកឡើងថា អ៊ីរ៉ង់បានបង្ហាញជំហរ និងការទាមទាររបស់ខ្លួន ដើម្បីឆ្លើយតបទៅនឹងសំណើបទឈប់បាញ់ថ្មីៗដែលត្រូវបានបញ្ជូនតាមរយៈអន្តរការី ដោយបន្ថែមថា ការចរចាគឺ «មិនត្រូវគ្នាជាមួយនឹងឱសានវាទ និងការគំរាមកំហែងប្រព្រឹត្តឧក្រិដ្ឋកម្មសង្គ្រាម» ឡើយ។

អ្នកនាំពាក្យ លោក Esmaeil Baghaei បាននិយាយថា ទីក្រុងតេអេរ៉ង់ មានលក្ខខណ្ឌជាច្រើនផ្អែកលើផលប្រយោជន៍ជាតិរបស់ខ្លួន ដែលត្រូវបានបញ្ជូនរួចហើយតាមរយៈបណ្តាញអន្តរការី ដោយលោកបានបន្ថែមថា ការទាមទាររបស់សហរដ្ឋអាមេរិកពីមុន ដូចជាផែនការ ១៥ចំណុចជាដើម ត្រូវបានបដិសេធដោយសារតែមានលក្ខណៈ «ហួសហេតុ»។

នៅក្នុងសន្និសីទសារព័ត៌មានមួយ លោក Baghaei បានប្រាប់ឲ្យដឹងថា៖ «អ៊ីរ៉ង់មិនស្ទាក់ស្ទើរ ក្នុងការបង្ហាញយ៉ាងច្បាស់នូវអ្វីដែលខ្លួនចាត់ទុកថា ជាការទាមទារស្របច្បាប់របស់ខ្លួនឡើយ ហើយការធ្វើដូច្នេះ មិនគួរត្រូវបានបកស្រាយថា ជាសញ្ញានៃការសម្របសម្រួលនោះទេ ប៉ុន្តែផ្ទុយទៅវិញជាការឆ្លុះបញ្ចាំងពីទំនុកចិត្ត ក្នុងការការពារជំហររបស់ខ្លួន»។

ដើម្បីឆ្លើយសំណួររបស់អ្នកសារព័ត៌មានអ៊ីរ៉ង់ម្នាក់ ទាក់ទងនឹងកិច្ចប្រឹងប្រែងជាបន្តបន្ទាប់ ក្នុងគោលបំនងនាំមកនូវបទឈប់បាញ់ រវាងអ៊ីរ៉ង់ និងសហរដ្ឋអាមេរិក អ្នកនាំពាក្យរូបនេះ បានបញ្ជាក់បន្ថែមថា៖ «យើងបានរៀបចំការឆ្លើយតបរបស់យើងផ្ទាល់ ហើយនឹងប្រកាសសេចក្ដីលម្អិត តាមពេលវេលាសមស្រប»៕