លោក Ebrahim Zolfaqari គឺជាអ្នកនាំពាក្យទីបញ្ជាការយោធាកណ្តាល Khatam al-Anbiya របស់អ៊ីរ៉ង់និយាយនៅក្នុងសេចក្តីថ្លែងការណ៍ជាវីដេអូចែករំលែកដោយសារព័ត៌មានរដ្ឋនៅថ្ងៃចន្ទនេះថា កងកម្លាំងសហរដ្ឋអាមេរិកដែលបំលាស់ទៅកាន់កោះ Bubiyan របស់គូវ៉ែត បានក្លាយជាគោលដៅវាយប្រហារដោយអ៊ីរ៉ង់ ។

លោក Zolfaqari និយាយថា អ៊ីរ៉ង់បានវាយប្រហារសម្ភារៈផ្កាយរណប និងគ្រាប់រំសេវនៅលើកោះនោះដោយប្រើប្រាស់យានដ្រូន ។

លោកបន្តថា កងកម្លាំងសហរដ្ឋអាមេរិកបានបំលាស់ទីទៅកាន់ទីនោះចេញពីបន្ទាយ Arifjan ក្រោយមូលដ្ឋានយោធាមួយនេះ រងការវាយប្រហារម្តងហើយម្តងទៀតពីអ៊ីរ៉ង់ ។

ខណៈពេលនោះដែរ ក្រសួងសុខាភិបាលគូវ៉ែត និយាយមុននេះថា មនុស្ស ៦នាក់ បានរងរបួសពីបំណែកធ្លាក់នៅតំបន់ភាគខាងជើងគូវ៉ែត ក្រោយការវាយប្រហាររបស់អ៊ីរ៉ង់ ។

សូមបញ្ជាក់ថា កោះ Bubiyan គឺជាកោះធំបំផុតរបស់គូវ៉ែត ស្ថិនៅភាគពាយ័ព្យតំបន់ឈូងសមុទ្រ ៕