ដោយលើកឡើងពីការបង្ហាញជាសាធារណៈថ្មីៗនេះនូវការបើករថក្រោះរបស់កូនស្រីវ័យជំទង់លោក គីម ជុងអ៊ុន (Kim Jong Un) ដែលទំនងជាមានបំណងបំបាត់ការសង្ស័យណាមួយនោះ សមាជិកសភា បាននិយាយនៅថ្ងៃចន្ទ (ទី៦ ខែមេសា ឆ្នាំ២០២៦) នេះថា ទីភ្នាក់ងារចារកម្មកូរ៉េ (កូរ៉េខាងត្បូង) ឥឡូវនេះ ជឿថា រូបនាងត្រូវបានរៀបចំ ដើម្បីក្លាយជាអ្នកស្នងតំណែងមេដឹកនាំកូរ៉េខាងជើង។

សេវាស៊ើបការណ៍សម្ងាត់ជាតិ (NIS) បានប្រាប់សមាជិកសភាថា ការវាយតម្លៃរបស់ខ្លួន មិនផ្អែកលើការសន្និដ្ឋានតាមកាលៈទេសៈទេ ប៉ុន្តែផ្អែកលើអ្វីដែលខ្លួនពិពណ៌នាថា ជា «ព័ត៌មានស៊ើបការណ៍សម្ងាត់គួរឲ្យទុកចិត្ត» ដែលប្រមូលបានដោយទីភ្នាក់ងារនេះ។ នេះបើយោងតាមការរាយការណ៍ដោយសមាជិកគណបក្សកាន់អំណាច និងគណបក្សប្រឆាំង បន្ទាប់ពីមានកិច្ចប្រជុំសភាបិទទ្វារ។

សមាជិកសភា បាននិយាយថា NIS បានឲ្យដឹងថា រូបភាពរបស់កូនស្រីបើករថក្រោះ គឺមានបំណងបង្ហាញពីសមត្ថភាពយោធារបស់នាង និងបំបាត់ការសង្ស័យ ជុំវិញអ្នកស្នងតំណែងជាស្ត្រី។

គួរបញ្ជាក់ថា កាលពីខែមុន ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានផ្សាយរូបថតរបស់លោក គីម និងកូនស្រីរបស់លោក កំពុងបើករថក្រោះថ្មី បន្ទាប់ពីមានរូបភាពមុនៗដែលបង្ហាញរូបនាងកំពុងបាញ់កាំភ្លើងនៅទីលានបាញ់កាំភ្លើង និងប្រើប្រាស់កាំភ្លើងខ្លី៕