តម្លៃផ្សារភាគហ៊ុនសកលបានធ្លាក់ចុះកាលពីថ្ងៃអង្គារ៦មេសាសប្ដាហ៍នេះ ខណៈតម្លៃប្រេងបានហក់ឡើងជាង១១០ដុល្លារក្នុងមួយបារ៉ែល ខណៈការរំពឹងទុកនៃការកើនឡើងនៃសង្គ្រាមនៅមជ្ឈិមបូព៌ា និងឱសានវាទសម្រាប់ការឈានដល់កិច្ចព្រមព្រៀងជិតមកដល់ ធ្វើឱ្យក្រុមវិនិយោគិនមានក្ដីបារម្ភកាន់តែខ្លាំង។

ទីផ្សារមានភាពរង្គោះរង្គើចាប់តាំងពីសង្គ្រាមអាមេរិក-អ៊ីស្រាអែលលើអ៊ីរ៉ង់បានផ្ទុះឡើងកាលពីចុងខែកុម្ភៈ២០២៦នេះ ដោយទីក្រុងតេអេរ៉ង់បានបិទច្រកសមុទ្រ Hormuz ជាផ្លូវដឹកជញ្ជូនប្រេងសកលដ៏សំខាន់មួយ ដែលបានជំរុញឱ្យមានការព្រួយបារម្ភអំពីអតិផរណាសកល។

ខណៈបណ្ដាវិនិយោគិនបានដាក់ក្តីសង្ឃឹមលើដំណោះស្រាយចំពោះសង្គ្រាម ការចរចារហូតមកដល់ពេលនេះមិនទាន់ទទួលបានវឌ្ឍនភាពនៅឡើយទេ ដោយប្រធានាធិបតីអាមេរិក Donald Trump បានដាក់កាលកំណត់ត្រឹមយប់ថ្ងៃអង្គារនេះ សម្រាប់កិច្ចព្រមព្រៀងដែលត្រូវសម្រេចបាន។

នោះបានធ្វើឱ្យទីផ្សារមានភាពច្របូកច្របល់ ដោយប្រាក់ដុល្លារអាមេរិករក្សាសន្ទុះរបស់ខ្លួន ហើយតម្លៃប្រេងកំពុងកើនឡើង។

តម្លៃប្រេងឆៅ Brent បានកើនឡើង ០,៤% ដល់១១០,១៩ ដុល្លារក្នុងមួយបារ៉ែល ខណៈប្រេងឆៅ West Texas Intermediate របស់សហរដ្ឋអាមេរិកដែរនោះ បានកើនឡើង០,៨% ដល់ ១១៣,៣១ ដុល្លារ ក្នុងមួយបារ៉ែល៕