ភ្នំពេញ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជា​មេ​​បញ្ជាការ​កងទ័ពជើងគោក នាថ្ងៃទី៣ ខែមេសា ឆ្នាំ២០២២នេះ បានជួបសំណេះសំណាល និង​ពិសារ​អាហារ​សាមគ្គីជាមួយ បងប្អូនកីឡាករ-កីឡាការិនី ជ័យ​លាភីម្ចាស់​មេដាយ​មាស​ក្នុង​ព្រឹត្តិការណ៍​អន្តរជាតិ។

ដើម្បីទទួលបានព័ត៌មានថ្មីៗ រហ័ស សូមចុច Join Channel Telegram BTV News 

ថ្លែង​នៅក្នុងពិធីនោះ លោកឧត្តមសេនីយ៍ឯក ហ៊ុន ម៉ាណែត បានថ្លែង​កោត​សរសើរ​ចំពោះ​ស្នាដៃ​ឯក​របស់​កីទ្បាករ កីទ្បាការិនីជ័យលាភីម្ចាស់មេដាយក្នុងព្រឹត្តិការណ៍អន្តរជាតិនានា ដែលបាន​កសាង​នូវស្នាដៃ និងគុណ​បំណាច់​ដ៏ខ្ពង់ខ្ពស់​ក្នុង​ការ​លើក​ស្ទួយ​មុខ​មាត់​កិត្យានុភាព​ជាតិ​នៅ​លើ​ឆាក​អន្តរជាតិ ដោយបង្កើតបានជាមោទកភាពរួមសម្រាប់ពលរដ្ឋខ្មែរគ្រប់រូប។

លោក​ឧត្តមសេនីយ៍ បានបន្តទៀតថា ម្លប់នៃសុខសន្តិភាព បានផ្តល់​ឱកាស​ឱ្យ​មាន​ការ​រីក​ចម្រើន​លើ​គ្រប់​វិស័យ រួមទាំងវិស័យកីទ្បា ដោយកាលពីមុន កម្ពុជាទទួល​បាន​មេដាយ​មាស​តិច​តួច​ប៉ុណ្ណោះ​នៅ​ក្នុងការចូលរួមព្រឹត្តិការណ៍អន្តរជាតិផ្សេងៗ ប៉ុន្តែមកដល់ពេលនេះ កម្ពុជាទទួល​បាន​មេដាយ​មាស​រហូតដល់ ៨៦ គ្រឿងពីការចូលរួមក្នុងព្រឹត្តិការណ៍អន្តរជាតិ។ នេះជាស្នាដៃរបស់កូនខ្មែរ ហើយជាសក្ខីភាព ​នៃ​ការ​អភិវឌ្ឍ​រីក​ចម្រើន​ជា​លំដាប់​នៃ​វិស័យ​កីឡានៅ​កម្ពុជា ហើយយើងក៏នឹងទទួលធ្វើជាម្ចាស់ផ្ទះរៀបចំកីទ្បាស៊ីហ្គេម លើកទី៣២ ក្នុងឆ្នាំ​២០២៣​ខាង​មុខ​ផងដែរ ដែលព្រឹត្តិការណ៍នេះ នឹងនាំមកនូវកិត្តិយស និងឧត្តម​ភាព​សម្រាប់​ជាតិ​ខ្មែរ​យើង​ក្នុង​ដំណើរ​ជាប្រវត្តិសាស្ត្រថ្មីមួយទៀតនៃតួនាទីកម្ពុជានៅក្នុងតំបន់។

ជាមួយគ្នានោះដែរ លោកឧត្តមសេនីយ៍ ក៏សូមអគុណកីឡាករ កីឡាការិនីទាំងអស់ សម្រាប់​ការ​លះបង់ និងការខិតខំ​ប្រឹងប្រែង​ព្យាយាម​យក​អស់​លទ្ធភាព​បន្ត​ហាត់​ហ្វឹកហ្វឺន​ត្រៀម​សម្រាប់​ព្រឹត្តិការណ៍​នា​ពេលខាងមុខ រួមជាមួយនឹងកម្លាំងចិត្តដ៏ខ្លាំងក្លា និងក្តីសង្ឃឹមយ៉ាង​មុត​មាំ​ក្នុង​ការ​លើក​តម្កើងកិត្តិយសជាតិខ្មែរនៅលើឆាកអន្តរជាតិ។ ទន្ទឹមនឹងនេះ ក៏សូមអរគុណ​ដល់​គ្រប់​តួអង្គពាក់ព័ន្ធ​ទាំងអស់ ដែលតែងបានជំរុញលើកទឹកចិត្ត និងបង្កលក្ខណៈដល់កីទ្បាករ កីទ្បាការិនីឱ្យ​ទទួលបានការហ្វឹកហាត់បានជាប់ជាប្រចាំ សំដៅធានា​បាន​នូវ​ជ័យ​ជម្នះ​ជូនជាតិមាតុភូមិ។ មួយវិញទៀត សកម្មភាពយ៉ាងផុសផុលនៅក្នុងវិស័យកីឡាបច្ចុប្បន្ន ក៏ជា​ចំណែក​មួយក្នុងការជំរុញការលេងកីឡាដើម្បីសុខភាព មិត្តភាព និងសាមគ្គីភាព នៅក្នុងមជ្ឈដ្ឋាន​ប្រជាជនគ្រប់វ័យផងដែរ៕ អត្ថបទ៖ បាន ចក់