​ចំបាប់៖ លោក ខេ​ស៊ី បា​ណេ​ត អនុប្រធាន​សហព័ន្ធ​កីឡា​ចំបាប់​កម្ពុជា និង​កីឡា​ប្រដាល់សកល​កម្ពុជា និង​ជានា​យក​វិទ្យាស្ថាន Cam-Ed Business School បាន​ឧបត្ថម្ភ​សម្ភារ​បរិក្ខារគឺ​ឡា​បូ​លាងដៃ​ចំនួន ៣៨ ដល់​សាលាបឋមសិក្សា​យក​បាត្រ នៅ​សង្កាត់​ក្បាលកោះ ខណ្ឌ​ច្បារអំពៅ រាជធានី​ភ្នំពេញ។ ពិធី​ប្រគល់​ឡា​ប៉ូ​លាងដៃ​នេះធ្វើឡើង​កាលពី​ចុង​សប្ដាហ៍​កន្លងទៅក្រោម​វត្តមាន​លោក សឿន ចាន់​សុំ តំណាង​លោក ខេ​ស៊ី បា​ណេ​ត និង​លោក វ៉ាន សាវុន នាយករង​សាលាបឋមសិក្សា​យក​បាត្រ។​

​លោក សឿន ចាន់​ស៊ី បាន​បញ្ជាក់ថា កម្មវិធី​នេះគឺ​ចង់​ឲ្យ​សិ​ស្សា​នុ​សិ​ស្សាដែលជា​កុមារ​តូចៗ ចេះ​រស់នៅ​ប្រកបដោយ​អនាម័យ និង​ចង់​ឲ្យ​និស្សិត​វិទ្យាស្ថាន Cam-Ed ចេះ​ផ្ដល់​អត្ថប្រយោជន៍​ដល់​សង្គម​វិញ ទោះ​រៀន​ដល់​កម្រិតណា ជោគ​ជ័យ​កម្រិត​ណាក៏ដោយ ដូចជា​ការងារ​សប្បុរ​ស​ធម៌ ឬក៏​ការងារ​សង្គម​ផ្សេងៗ។ ក្រៅពី​ការងារ​សង្គមក៏មាន​វិស័យ​កីឡា​ផងដែរ តាមរយៈ​ឧបត្ថម្ភ​សម្ភារ ថវិកា​ដល់​សហព័ន្ធ​កីឡា​ជាតិ ពិសេស​ក្រោម​ការចង្អុលបង្ហាញ​រប​ស់លោក ខេ​ស៊ី បា​ណែ​ត បាន​ជំរុញ​ឲ្យ​មាន​ព្រឹ​ត្ដិ​ការណ៍​កីឡា​ជាច្រើន​ទៀតផង។​ ​ទន្ទឹម​ជាមួយគ្នា​លោក វ៉ាន សាវុន បាន​សម្តែង​ក្តី​រីករាយ ចំពោះ​ការទទួលបាន​នូវ​ឡា​បូ​លាងដៃ សម្រាប់​ប្រើប្រាស់​រួម​ក្នុង​សាលា និង​ការចែករំលែក​បទពិសោធ​ន៍​ល្អៗ អំពី​ការរស់នៅ​ស្អាតតាមរយៈ​ការលាង​ដៃដល់​សិស្សានុសិស្ស ហើយ​លោក​រំពឹងថា កម្មវិធី​នេះនឹង​រួមចំណែក​ឲ្យ​កូនសិស្ស​ទាំងអស់ បាន​យល់ដឹង​បន្ថែមអំពី​ការការពារ​ខ្លួន​ពី​ជំងឺ​រាតត្បាត​ជាស​កល​កូ​វីដ​-១៩ ផងដែរ។​​

​សូមបញ្ជាក់ថា ថ្នាក់ដឹកនាំ​កីឡា​ចំបាប់ និង​កីឡា​ប្រដា​សល់ និង​ជានា​យក​វិទ្យាស្ថាន Cam-Ed លោក ខេ​ស៊ី បា​ណេ​ត បាន​បញ្ជូន​ក្រុមការងារ​រៀបចំ​កម្មវិធី​សប្បុរសធម៌​នេះ គឺ​ដើម្បី​ចែករំលែក​ចំណេះដឹង​ឲ្យ​សិស្សានុសិស្ស​បាន​យល់ដឹង​អំពី​អត្ថប្រយោជន៍នៃ​ការ​លាងដៃ ការរស់នៅ​ស្អាត​ប្រកបដោយ​អនាម័យ​ប្រចាំថ្ងៃ ដើម្បី​ចៀស​ឆ្ងាយ​ពី​ជំងឺ​ផ្សេងៗ ពិសេស​ជំងឺ​កូ​វីដ​-១៩ តែម្ដង៕

​អត្ថបទ៖ លី ឈុន​ឡា