ប្រធានាធិបតីអ៊ុយក្រែន លោក Volodymyr Zelenskyy បានស្វាគមន៍ចំពោះកិច្ចព្រមព្រៀងបទឈប់បាញ់រវាងសហរដ្ឋអាមេរិក និងអ៊ីរ៉ង់ ដោយនិយាយថាប្រទេសរបស់លោកនឹងត្រៀមខ្លួនធ្វើដូចគ្នានេះដែរប្រសិនបើរុស្ស៊ី បញ្ឈប់ការវាយប្រហារ។

នៅក្នុងការបង្ហោះនៅលើបណ្តាញផ្សព្វផ្សាយសង្គមកាលពីថ្ងៃពុធ លោក Zelenskyy បាននិយាយថា «បទឈប់បាញ់គឺជាការសម្រេចចិត្តដ៏ត្រឹមត្រូវ ដែលឈានទៅដល់ការបញ្ចប់សង្គ្រាម» ហើយអ៊ុយក្រែនគាំទ្រការសម្រេចចិត្តនេះ។ 

លោក Zelenskyy និយាយថា ស្ថានភាពនៅក្នុងតំបន់មានផលប៉ះពាល់ជាសកល ដោយព្រមានថា «ការគំរាមកំហែងណាមួយចំពោះសន្តិសុខ និងស្ថិរភាពនៅតំបន់មជ្ឈិមបូព៌ា និងឈូងសមុទ្រ បង្កើនបញ្ហាប្រឈមសម្រាប់សេដ្ឋកិច្ច និងការចំណាយសម្រាប់ជីវភាពរស់នៅក្នុងប្រទេសនីមួយៗ»។

អ៊ុយក្រែន បានបញ្ជូនអ្នកជំនាញយោធាទៅកាន់ប្រទេសឈូងសមុទ្រ ដើម្បីជួយដោយយានដ្រូនស្ទាក់ចាប់ និងជួយនៅតំបន់ផ្សេងៗទៀត។ លោក Zelenskyy បាននិយាយថា ក្រុមអ្នកជំនាញនឹងបន្តធ្វើការនៅក្នុងតំបន់នោះ។

ទន្ទឹមនឹងនេះលោកប្រធានាធិបតី បាននិយាយថា អ៊ុយក្រែនតែងតែអំពាវនាវឱ្យមានបទឈប់បាញ់ជាមួយរុស្ស៊ី ហើយត្រៀមខ្លួនឆ្លើយតប ប្រសិនបើប្រទេសនេះបញ្ឈប់ការវាយប្រហាររបស់ខ្លួន។