អ៊ីរ៉ង់នៅថ្ងៃព្រហស្បតិ៍នេះ បានប្រកាសផ្លូវជំនួសសម្រាប់នាវាដែលធ្វើដំណើរឆ្លងកាត់ច្រកសមុទ្រហ័រមូស ដោយលើកឡើងពីហានិភ័យនៃមីនសមុទ្រ នៅក្នុងតំបន់ដ៏ធំនៃផ្លូវទឹកដ៏សំខាន់នេះ។

ទីក្រុងតេអេរ៉ង់ បានយល់ព្រមបើកច្រកសមុទ្រនេះឡើងវិញជាបណ្ដោះអាសន្ន ដែលប្រេងមួយភាគប្រាំរបស់ពិភពលោកជាធម្មតាឆ្លងកាត់ ដែលជាផ្នែកមួយនៃបទឈប់បាញ់រយៈពេលពីរសប្តាហ៍។

កងកម្លាំងឆ្មាំបដិវត្តន៍អ៊ីរ៉ង់ បាននិយាយនៅក្នុងសេចក្តីថ្លែងការណ៍មួយដែលត្រូវបានដកស្រង់ដោយប្រព័ន្ធផ្សព្វផ្សាយក្នុងស្រុកថា៖«នាវាទាំងអស់ដែលមានបំណងឆ្លងកាត់ច្រកសមុទ្រហ័រមូស ត្រូវបានជូនដំណឹងថា ដើម្បីអនុវត្តតាមគោលការណ៍សុវត្ថិភាពសមុទ្រ និងការពារពីការប៉ះទង្គិចគ្នាជាមួយមីនសមុទ្រ...ពួកគេ គួរតែប្រើផ្លូវជំនួសសម្រាប់ចរាចរណ៍ នៅក្នុងច្រកសមុទ្រហ័រមូស»។

សេចក្តីថ្លែងការណ៍នេះ បានចែករំលែកការណែនាំសម្រាប់ផ្លូវចូល និងចេញជំនួស តាមរយៈច្រកសមុទ្រនេះ។

សហរដ្ឋអាមេរិក និងអ៊ីរ៉ង់ បានយល់ព្រមលើបទឈប់បាញ់រយៈពេលពីរសប្តាហ៍ទាំងយប់ ចាប់ពីថ្ងៃអង្គារដល់ថ្ងៃពុធ រយៈពេលតិចជាងមួយម៉ោងមុនថ្ងៃផុតកំណត់របស់ប្រធានាធិបតីអាមេរិកលោក ដូណាល់ ត្រាំ ក្នុងការបំផ្លាញសាធារណរដ្ឋឥស្លាមនេះ ប្រសិនបើប្រទេសនេះ មិនធ្វើតាមការទាមទាររបស់លោកសម្រាប់កិច្ចព្រមព្រៀងមួយ ដើម្បីបើកច្រកសមុទ្រហ័រមូសឡើងវិញទេ៕