ក្រុមអាជ្ញាធរនិយាយនៅថ្ងៃព្រហស្បតិ៍នេះថា មនុស្ស ៤នាក់ បានស្លាប់ ក្រោយជនអន្តោប្រវេសន៍មួយក្រុមព្យាយាមឡើងជិះទូកពោង ដើម្បីធ្វើដំណើរឆ្លងកាត់ផ្លូវសមុទ្រចេញពីបារាំងទៅកាន់អង់គ្លេស ជំរុញឲ្យមានប្រិបត្តិការជួយសង្រ្គោះនៅជិតតំបន់ឆ្នេរទីក្រុង Calais ។

លោក Christian Fourcroy គឺជាអភិបាលក្នុងស្រុកមួយរូបនិយាយប្រាប់ទូរទស្សន៍ BFMTV ថា មាននូវជនអន្តោប្រវេសន៍ប្រហែល ៣០នាក់ បានព្យាយាមធ្វើដំណើរតាមទូក ប៉ុន្តែអកុសល ទូកក៏បានលិច ។ ពួកគេបានធ្លាក់ចូលទឹកទាំងអស់គ្នា ហើយមនុស្ស ៤នាក់ បានស្លាប់ ក្នុងនោះមានបុរស ២នាក់ និងស្រ្តី ២នាក់ ។

ក្រុមអាជ្ញាធរក្នុងស្រុកនិយាយថា ម៉ាស៊ីនទូកពោងបានលិចទឹក ហើយនិងបន្តដំណើរទៅកាន់អង់គ្លេស មុនពេលវាលិចទាំងស្រុង ។

ក្នុងរយៈពេល ១ឆ្នាំកន្លងមកនេះ ក្រុមអ្នកជួញដូរមនុស្សខុសច្បាប់ បានព្យាយាមគេចវេសពីនគរបាល ដោយប្រើទូកពោង ដើម្បីធ្វើដំណើរតាមបណ្តោយឆ្នេរភាគខាងជើងបារាំង និងបែលហ្ស៊ិក ៕