មន្ត្រីក្រសួងការបរទេសមួយរូបបាននិយាយកាលពីថ្ងៃព្រហស្បតិ៍៩ មេសាសប្ដាហ៍នេះ ថា អ៊ីស្រាអែល និងលីបង់ នឹងធ្វើកិច្ចចរចានៅសប្តាហ៍ក្រោយនៅទីក្រុងវ៉ាស៊ីនតោន ស្របពេលមានការព្រួយបារម្ភកាន់តែខ្លាំងពីអន្តរជាតិថា ការទម្លាក់គ្រាប់បែករបស់អ៊ីស្រាអែលអាចបំផ្លាញបទឈប់បាញ់ដ៏ផុយស្រួយរួចទៅហើយរវាងអាមេរិក និងអ៊ីរ៉ង់។ 

ការវាយប្រហារយ៉ាងធ្ងន់ធ្ងរបំផុតរបស់អ៊ីស្រាអែលលើប្រទេសលីបង់ចាប់តាំងពីក្រុមហេសបូឡាបានចូលរួមក្នុងសង្គ្រាមមជ្ឈិមបូព៌ានៅដើមខែមីនា បានសម្លាប់មនុស្សរាប់រយនាក់កាលពីថ្ងៃពុធ ៨មេសា សប្ដាហ៍នេះ ដែលធ្វើឲ្យមានភាពរង្គោះរង្គើនៃបទឈប់បាញ់រវាងទីក្រុងវ៉ាស៊ីនតោន និងទីក្រុងតេអេរ៉ង់ក្នុងរយៈពេលប្រមាណ៤៨ម៉ោងបន្ទាប់ពីចូលជាធរមាន។  

មន្ត្រីសហរដ្ឋអាមេរិកបាននិយាយថា ពួកលោកអាចបញ្ជាក់បានថាក្រសួងការបរទេស នឹងរៀបចំកិច្ចប្រជុំមួយនៅសប្តាហ៍ក្រោយដើម្បីពិភាក្សាអំពីការចរចាបទឈប់បាញ់ដែលកំពុងបន្តជាមួយអ៊ីស្រាអែល និងលីបង់។

លោកនាយករដ្ឋមន្ត្រីអ៊ីស្រាអែល Benjamin Netanyahu កាលពីព្រឹកថ្ងៃព្រហស្បតិ៍៩មេសាសប្ដាហ៍នេះ បានបញ្ជាឱ្យក្រុមរដ្ឋមន្ត្រីរបស់លោកស្វែងរកការចរចាដោយផ្ទាល់ជាមួយលីបង់ ដោយជំរុញឱ្យមានការរំសាយអាវុធរបស់ក្រុមហេសបូឡាគាំទ្រដោយអ៊ីរ៉ង់។

ប៉ុន្តែមន្ត្រីរដ្ឋាភិបាលលីបង់មួយរូបបានប្រាប់សារព័ត៌មាន AFP បន្ទាប់ពីការប្រកាសរបស់លោក Netanyahu ថា ទីក្រុងបេរូតតម្រូវឱ្យមានបទឈប់បាញ់មុនពេលចាប់ផ្តើមការចរចាណាមួយជាមួយអ៊ីស្រាអែល មួយថ្ងៃ បន្ទាប់ពីការវាយប្រហារដ៏សាហាវនៅទូទាំងប្រទេសលីបង់។

មន្ត្រីរដ្ឋាភិបាលលីបង់ដែលបានដឹងពីបញ្ហានេះ និងបានស្នើសុំមិនបញ្ចេញឈ្មោះ បាននិយាយថា លីបង់ចង់បានបទឈប់បាញ់មុនពេលចាប់ផ្តើមការចរចា។ទាំងអ៊ីស្រាអែល និងលីបង់ ពុំទាន់បានបញ្ជាក់ជាសាធារណៈអំពីកិច្ចចរចារបស់សហរដ្ឋអាមេរិកសម្រាប់សប្តាហ៍ក្រោយនៅឡើយទេ៕