អ៊ុយក្រែន៖ សាកសពជាច្រើននៅរាយប៉ាយតាមដងផ្លូវក្នុងទីក្រុងមួយរបស់ប្រទេសអ៊ុយក្រែន ដែលបានបន្សល់ទុកដោយកងកម្លាំងរុស្ស៊ី បាននាំឲ្យមានការថ្កោលទោសជាអន្តរជាតិនៅក្នុងអឺរ៉ុបនៅថ្ងៃទី៣៩ នៃការវាយលុករបស់រុស្ស៊ីលើអ៊ុយក្រែន។
ក្រុមអាជ្ញាធរអ៊ុយក្រែនបានរកឃើញសាកសពចំនួន ៤១០នាក់នៅក្នុងទីក្រុង និងទីប្រជុំជនជាច្រើនជិតរដ្ឋធានីគីវ ជាផ្នែកមួយនៃការស៊ើបអង្កេតដែលអាចចាត់ទុកជាឧក្រិដ្ឋកម្មសង្គ្រាម ដែលពួកគេថាជាស្នាដៃរបស់រុស្ស៊ីមុនពេលដកចេញ។ មេដឹកនាំសហភាពអឺរ៉ុប និងអាមេរិកបានឆ្លើយតបទៅកាន់ភស្តុតាងដ៏រន្ធត់ នៃអំពើឃោរឃៅលើជនស៊ីវិលដោយកងកម្លាំងរុស្ស៊ី ដែលត្រូវបានរាយប៉ាយនៅទូទាំងតំបន់ជាយក្រុងគីវ និងទីប្រជុំជនជាច្រើន។ លោកនាយករដ្ឋមន្ត្រីអង់គ្លេស Boris Johnson បានចោទប្រកាន់រុស្ស៊ីពីបទវាយប្រហារដោយមិនរើសមុខ លើជនស៊ីវិលអ៊ុយក្រែនក្នុងទីក្រុង Bucha និងទីប្រជុំជនមួយផ្សេងទៀត ដោយនិយាយថា ប្រទេសរបស់លោកនឹងមិនសម្រាកទេរហូតយុត្តិធម៌ត្រូវបានផ្ដល់ឲ្យជនរងគ្រោះ។
ចំណែករដ្ឋមន្ត្រីការបរទេសអាមេរិកលោក Antony Blinken បានហៅរូបភាពនៃសាកសពដេកស្លាប់រាយប៉ាយក្នុងទីក្រុង Bucha ថាជាការធ្វើឲ្យឈឺចាប់ ហើយប្រធានគណៈកម្មការអឺរ៉ុបលោកស្រី Ursula von der Leyen បាននិយាយថា ការស៊ើបអង្កេតដោយឯករាជ្យត្រូវតែធ្វើជាបន្ទាន់។ ប្រទេសអាល្លឺម៉ង់បាននិយាយកាលពីថ្ងៃអាទិត្យថា លោកខាងលិចនឹងព្រមព្រៀងដាក់ទណ្ឌកម្មបន្ថែមទៀតលើរុស្ស៊ីក្នុងពេលប៉ុន្មានថ្ងៃខាងមុខ បន្ទាប់ពីអ៊ុយក្រែនចោទប្រកាន់កងកម្លាំងរុស្ស៊ីពីបទប្រព្រឹត្តឧក្រិដ្ឋកម្មសង្គ្រាមជិតរដ្ឋធានីគីវ ជាការពង្រីកទំហំគំនាបសេដ្ឋកិច្ចលើរុស្ស៊ីដែលមានស្រាប់ដោយសារតែការវាយប្រហារលើអ៊ុយក្រែន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
