មន្ត្រីមូស្គូម្នាក់ បាននិយាយកាលពីថ្ងៃព្រហស្បតិ៍ថា រុស្ស៊ីបានប្រគល់សាកសពទាហានអ៊ុយក្រែនចំនួន ១.០០០នាក់ ទៅឲ្យទីក្រុងគីវ ដោយអ៊ុយក្រែនបានប្រគល់សាកសពទាហានរុស្ស៊ីចំនួន ៣៥នាក់ ជាថ្នូរនឹងការដោះដូរនេះ។

ភាគីទាំងពីរតែងតែដោះដូរសាកសពទាហាន ដែលបានស្លាប់ក្នុងសមរភូមិ ជាផ្នែកមួយនៃកិច្ចសហប្រតិបត្តិការរបស់ពួកគេ។

លោក Vladimir Medinsky អ្នកចរចាជាន់ខ្ពស់របស់ទីក្រុងមូស្គូ បាននិយាយនៅលើប្រព័ន្ធផ្សព្វផ្សាយសង្គមថា៖«សាកសពទាហានអ៊ុយក្រែនដែលបានស្លាប់ចំនួន ១.០០០នាក់ ត្រូវបានប្រគល់ទៅឲ្យអ៊ុយក្រែន។ រុស្ស៊ីត្រូវបានប្រគល់ឲ្យមកវិញនូវសាកសពយុទ្ធជនរបស់ខ្លួន ដែលបានស្លាប់ចំនួន ៣៥នាក់»។

លោកបានបង្ហោះរូបថតមួយដែលបង្ហាញពីបុរសស្លៀកឈុតពណ៌ស និងស្រោមដៃពណ៌ខៀវលើកថង់សាកសពពណ៌សពីរថយន្តមានទូរក្លាស្សេ។

ទាហានរាប់រយរាប់ពាន់នាក់ ត្រូវបានសម្លាប់ នៅក្នុងសង្គ្រាមរយៈពេល ៤ឆ្នាំ ដែលបានកើតឡើង នៅពេលដែលទីក្រុងមូស្គូ បានចាប់ផ្តើមការវាយលុកពេញបន្ទុកប្រឆាំងនឹងអ៊ុយក្រែន ក្នុងខែកុម្ភៈ ឆ្នាំ២០២២៕