ភ្នំពេញ៖ លោកវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញប្រាប់BTVព័ត៌មានថា ប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ គិតត្រឹមព្រឹកថ្ងៃទី០៤ ខែមេសា ឆ្នាំ២០២២នេះ អាយុចាប់ពី១៨ឆ្នាំឡើង បានមកចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ បានចំនួន៩៩% និងដូសជំរុញទី៤ បានចំនួន៦១%។

លោកវេជ្ជបណ្ឌិត ងី មានហេង បានបន្តថា មណ្ឌលចាក់វ៉ាក់សាំងបង្ការជំងឺកូវីដ-១៩​ស្ថិតនៅតាម មនី្ទរពេទ្យជាតិ និងមណ្ឌលសុខភាពទាំង៤២ទីតាំង ក្នុងរាជធានីភ្នំពេញ នៅបន្ត​ដំណើរ​ការចាក់វ៉ាក់​សាំង​ជូនបងប្អូនប្រជាពលរដ្ឋជាធម្មតា ហើយក្រុមការងារគ្រូពេទ្យ​ នៃមនី្ទរ​សុខា​ភិបាល​រាជធានីភ្នំពេញ ក្រៅពីការងារចាក់វ៉ាក់សាំង ក៏ចូលរួមយ៉ាងសកម្មក្នុងការពិនិត្យ និងព្យាបាល​ជំងឺ​ជូន​បងប្អូន ប្រជាពលរដ្ឋ ព្រមទាំងចុះអប់រំផ្សព្វផ្សាយអំពីវិធានការ ការពារ ទប់ស្កាត់​ការឆ្លង​រីករាល​ដាល​ជំងឺកូវីដ-១៩ ក្នុងសហគមន៍តាមខ្នងផ្ទះប្រជាពលរដ្ឋផងដែរ។ 

បើតាម​របាយ​ការណ៍ មានប្រជាពលរដ្ឋបានមកទទួលការចាក់វ៉ាក់សាំងបង្ការជំងឺកូវីដ-១៩នៅទូទាំង​ប្រទេស លើប្រជាជនអាយុចាប់ពី១៨ឆ្នាំឡើង មាន១០២,៦៩% ធៀបជា​មួយចំនួន​ប្រជាជន​គោល​ដៅ ១០លាននាក់៕ អត្ថបទ៖ ហួត​ រដ្ឋា