ដើម្បីទទួលបានព័ត៌មានថ្មីៗ រហ័ស សូមចុច Join Channel Telegram BTV News 

ភ្នំពេញ៖ មកដល់ថ្ងៃនេះ បណ្តាទីតាំងមុខវត្តអារ៉ាម រមណីយដ្ឋានទេសចរណ៍វត្តភ្នំ ផ្សារម៉ាត និង​អាជីវកម្ម​ទេសចរណ៍​មួយ​ចំនួន​​ទៀត​នៅ​រាជធានីភ្នំពេញ បានបន្តការរៀបចំតុបតែងមានចងទង់លម្អ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីខ្មែរ ដែលនឹងឈានចូលមកនៅថ្ងៃទី១៤ ដល់ថ្ងៃទី១៦ ខែមេសានេះ។

បើតាមក្រុមយុវជនមួយក្រុមនៃសាលាពុទ្ធិកៈសីហនុរាជ បានថ្លែងថា ប្រាប់BTVនៅថ្ងៃទី៤ ខែមេសានេះថា នៅក្នុងឆ្នាំនេះ មានការត្រេកអរជាខ្លាំងដែលរាជរដ្ឋាភិបាល អនុញ្ញាតរៀបចំពិធីបុណ្យចូលឆ្នាំប្រពៃណីជាតិខ្មែរឡើងវិញ ខណៈពិ​ធី​បុណ្យ​នេះ​បាន​អាក់​ខានចំនួន២ឆ្នាំកន្លងកន្លងមកហើយ។

ដើម្បីចូលរួមអបអរសាទរពិធីបុណ្យចូលឆ្នាំថ្មីនោះ ក្រុមយុវជន​ក៏​បាន​ស្នើ​ព្រះសង្ឈ​វត្តស្វាយ​អំពែ​ និង​លោក​គ្រូអ្នក​គ្រូរៀប​ចំ​កម្មវិធី​សង្គ្រាន្តឆ្នាំថ្មីមុនថ្ងៃបុណ្យចូលឆ្នាំថ្មីមកដល់ ដើម្បីអោយក្រុមយុវជន និងសិស្សនិស្សិត​ទាំងអស់​បាន​លេង​ល្បែង​កម្សាន្ត​រួម​គ្នាមុននឹងយើងបែកគ្នាទៅស្រុកកំណើត។

បណ្តាក្រុមយុវជនក៏បានបង្ហាញពីការប្រុងប្រយ័ត្នផងដែរចំពោះការលែងល្បែងកម្សាន្តអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរដោយត្រូវអនុវត្តវិធានការ ៣កុំ ៣ការពារ ដោយត្រូវពាក់ម៉ាស់រក្សាគន្លាត លាងដៃអាកុលជែល ដើម្បី​កាត់​ផ្តាច់​មេរោគ​កូវីដ១៩ និងកូវីដអូមីក្រុងអោយអស់ពីទឹកដីកម្ពុជា។

បើតាម លោក​​ ជុំ វុឌ្ឍី ប្រធានមន្ទីរវប្បធម៌ វិចិត្រសិល្បៈរាជធានីភ្នំពេញពានថ្លែងថា សម្រាប់ទីតាំងវត្តភ្នំនៅថ្ងៃនេះ បានចាប់ផ្តើមប្រមូលសំភារៈចូល ដើម្បីរៀបចំផ្គុំតំឡើងតង់ពិព័រណ៌ រៀបចំកម្មវិធីសង្គ្រាន្ត និងរៀបចំទីតាំងប្រគំដន្ត្រី រាំកម្សាន្ត ជាបណ្តើរៗ ហើយរំពឹងថា ប្រជាពលរដ្ឋ និង​ភ្ញៀវទេសចរ​ជាតិ​ អន្តរជាតិ ចូល​រួម​ទស្សនា​ច្រើន​ដូច​បណ្តា​ឆ្នាំ​កន្លង​មក​។

សម្រាប់រៀបចំកម្មវិធីបុណ្យចូលឆ្នាំថ្មីប្រពៃណីជាតិខ្មែរឡើងវិញ លោក កើត ឆែ អភិបាលរងរាជធានីភ្នំពេញ ថ្មីៗ​នេះ​ក៏បាន​អំពាវ​នា​វ​អោយ​បណ្តាអាជ្ញាធរមូលដ្ឋានទាំងអស់ សូមសហការជាមួយបណ្តាវត្តអារ៉ាម អ្នកគ្រប់គ្រងរមណីយដ្ឋាន​ទេសចរណ៍​នានា និងម្ចាស់អាជីវកម្មទេសចរណ៍នានា ធ្វើយ៉ាងណាជម្រុញអោយពលរដ្ឋ និងភ្ញៀវទេសចរ​ជាតិ​ អន្តរជាតិ ​ ដែល​ចូលរួមក្នុងកម្មវីសង្គ្រាន្តលេងកម្សាន្តប្រជាប្រិយនានាទៀត និ​ង​ចូលរួម​រៀបចំ​កម្មវិធី​នៅ​ក្នុង​វត្ត​ជា​ដើម​ គឺ​ត្រូវ​ពាក់​ម៉ាស់​ជាដាច់ខាត​ ដើម្បីកុំ​អោយសហគមមានការរាតត្បាតកូវីដ១៩។ អត្ថបទ៖ ស៊ុម សុខជា