​បាល់ទាត់៖ ​អតីត​អ្នកចាត់ការ​ក្រុម​បិសាច​ក្រហម Manchester United លោក Louis van Gaal បាន​ទម្លាយ​ថា ​លោក​កំពុង​ទទួល​ការ​ព្យាបាល​ជំងឺ​មហារីក​ក្រពេញ​ប្រូ​ស្តា​ត​។ បុរស​សញ្ជាតិ​ហូ​ឡង់​រូប​នេះបច្ចុប្បន្ន​កំពុង​ដឹកនាំ​ក្រុម​ជំរើសជាតិ​ហូ​ឡង់ និង​បាន​ប្រកាស​ពី​អាការៈ​ជំងឺ​របស់​លោក​នៅ​ក្នុង​កម្ម​វិធី​ទូរទស្សន៍​មួយ​កាលពី​ថ្ងៃអាទិត្យ​។

​​បុរស​វ័យ ៧០​ឆ្នាំ​រូប​នេះ​និយាយ​ទៀត​ថា លោក​មិន​ឱ្យ​ដំណឹង​នេះ​ដឹង​ដល់​កីឡាករ​ឡើយ​អំឡុង​ពេល​ប្រកួត​លក្ខណៈ​អន្តរជាតិ​នោះ ពី​ព្រោះតែ​ខ្លាច​ប៉ះពាល់​ដល់​អារម្មណ៍​របស់​ពួកគេ​។ ​​លោក​បាន​បន្ថែម​ថា អំឡុង​ពេល​ដឹកនាំ​ក្រុម​ជំរើសជាតិ លោក​តែងតែ​ចាក​ចេញទៅ​មន្ទីរពេទ្យ​ក្រោយពេល​ដឹកនាំ​ក្រុម​ហើយ ខណៈ​កីឡាករ​ទាំងអស់​មិន​ដឹង​រឿង​នេះ​ឡើយ ហើយ​ពួកគេ​សុទ្ធតែ​គិត​ថា​លោក​មាន​សុខ​ភាព​ល្អ តែ​ការពិត​មិនមែន​ទេ​។

​​សូម​បញ្ជាក់​ថា ​លោក Louis van Gaal កំពុង​កាន់​តំណែង​ដឹកនាំ​ក្រុម​ជំរើសជាតិ​ហូ​ឡង់​ជា​លើក​ទី៣ បន្ទាប់ពី​ធ្លាប់​ដឹកនាំ​ក្រុម​បាន​លេខ៣ ​នៅ World Cup 2014 និង​ពេលនេះ​ត្រូវ​ដឹកនាំ​ក្រុម​នៅ World Cup 2022 នៅ​កាតា​ឆ្នាំនេះ​។ ​​ជាមួយ​អាជីព​ដឹកនាំ​ក្លិប​វិញ​លោក Van Gaal ធ្លាប់​ចំណាយ​ពេល​ពីរ​ឆ្នាំ​ដឹកនាំ Manchester United ឈ្នះ​ពាន FA Cup នៅ​ឆ្នាំ ២០១៦ មុន​ពេល​ត្រូវ​បាន​ជំនួស​ដោយ Jose Mourinho​។​ ​ក្រៅពីនោះ​លោក​ក៏​ធ្លាប់​ដឹកនាំ​ក្រុម​ឈ្នះ​ពាន​លី​គ​កំពូល​ជាមួយ Barcelona, Bayern Munich, AZ Alkmaar និង Ajax Amsterdam ផង​ដែរ​៕

​អត្ថបទ​៖​នាង សុភា​វុ​ធ