នៅរសៀលថ្ងៃទី១១ ខែមេសា នេះ ព្រឹត្តិការណ៍ «នគរសង្ក្រាន្ត» ផ្សារទួលទំពូង នឹង​ចាប់​ផ្តើម​ដំណើរ​ការ​មុន​បណ្តាទីតាំងនគរសង្ក្រាន្តធំៗ៥ដទៃផ្សេងទៀត ក្នុងរាជធានីភ្នំពេញ។

បណ្តោយ​ផ្លូវ​ជុំវិញបរិវេណផ្សារទួលទំពូងទាំងមូល មានផ្លូវលេខ១៥៥ , ១៦៣ , ផ្លូវលេខ៤៤០ និង៤៥០ ត្រូវបានរៀបចំ តុបតែងលម្អរ ដោយមានការចងកន្សែង ក្រមា និងទង់​ជាតិ​ខ្មែរ​នៅ​ពី​លើ​បរិវេណ​ទី​តាំង​ប្រារព្ធពិធី អមជាមួយការរៀបចំឆាកតន្ត្រី និងការតុបតែង​បែប​ប្រពៃណីជា​​ច្រើន​ទៀត ​ដើម្បីលម្អងបរិយាកាសឲ្យសមនឹងព្រឹត្តិការណ៍ ដែលកំពុង​បង្ហាញ​ពី​ទំនៀម​ទំលាប់​វប្បធម៌ជា​តិ ក្នុងឱកាសបុណ្យចូលឆ្នាំថ្មីប្រពៃណីខ្មែរ ឆ្នាំ២០២៦នេះ ។

ទន្ទឹមនឹងការរៀបចំ បណ្តាបងប្អូនក្រុមអាជីវករ ក៏បាននឹងកំពុង​រៀបចំការ​លក់ដូរ​របស់​ខ្លួន​ជា​បណ្តើរ​ៗ ​ត្រៀមសម្រាប់លក់ជូនភ្ញៀវជាតិ និងអន្តរជាតិ ដែលនឹងអញ្ជើញ​នាំ​គ្នា​ទៅ​ចូល​រួម​លេង​កម្សាន្ត​សប្បាយ​តាមបែបប្រពៃណីខ្មែរ នៅរសៀលនេះ ។

តាមការគ្រោងទុក នៅរសៀលនេះ នៅពេលដែលព្រឹត្តិការណ៍នគរសង្ក្រាន្តចាប់ផ្តើមដំណើរការ លំហូរ​ចរាចរណ៍ធ្វើដំណើរ នឹងត្រូវកម្លាំងអាជ្ញាធរមានសមត្ថកិច្ចធ្វើការបិទទាំងស្រុង នៅលើ​ផ្លូវ​ទាំង​៤​ជុំវិ​ញបរិវេណផ្សារ ដើម្បីទុកលទ្ធភាពជូនភ្ញៀវជាតិ និងអន្តរជាតិ អញ្ជើញទៅកម្សាន្ត ។ ទន្ទឹម​នឹងនោះ កិច្ចការការពាររក្សាសន្តិសុខសុវត្ថិភាព និងរបៀបរៀបរយសាធារណៈ ក៏ត្រូវ​បាន​ពង្រឹងផ​ង​ដែរ ដោយកងកម្លាំងសមត្ថកិច្ចចម្រុះ ។

ពលរដ្ឋ រស់នៅក្បែរតំបន់រៀបចំព្រឹត្តិការណ៍ បង្ហាញក្តីរំភើបរីករាយ ហើយពួកគាត់ នឹងចូល​រួម​លេង​កម្សាន្ត​សប្បាយ នៅរសៀលនេះ​ជាមួយ​កម្ម​វិធី​សប្បាយ​ភាព​បែប​ប្រពៃណី​នានា​ដែល​មាន​ការ​រៀបចំ។

ដោយឡែកក្រុមអាជីវករ ក៏រីករាយមិនចាញ់ពលរដ្ឋរស់ក្នុងតំបន់នោះដែរ ព្រោះនៅ​ពេល​មាន​ព្រឹត្តិការណ៍​ធំ​បែបនេះ នឹងញ៉ាងឲ្យមានមនុស្សចូលរួមច្រើនកុះករ ដែលជាចំណែក នៃការជួយ​ជំរុញ​ការលក់ដូរពួកគាត់ឲ្យកាន់តែប្រសើរឡើងផងដែរ ក្នុងឱកាសបុណ្យចូលឆ្នាំថ្មីនេះ ។

គួរបញ្ជាក់ថា ព្រឹត្តិការណ៍ “ នគរសង្ក្រាន្ត “ ឆ្នាំថ្មីនេះ នឹងធ្វើឡើងរយៈពេល០៦ថ្ងៃ គិត​ចាប់​ពី​ថ្ងៃ​ទី​១៤ ដល់ថ្ងៃទី១៩ ខែមេសា ឆ្នាំ២០២៦ នៅតាមទីតាំងធំៗចំនួន០៦ រួមមាន ៖ រមណីយដ្ឋាន​វប្បធម៌​ប្រវត្តិ​សាស្ត្រវត្តភ្នំ , ផ្លូវថ្មើរជើងចតុមុខ (Walk street) , សួនវត្តបទុមវតី , ផ្សារទួលទំពូង , សួនច្បារវឌ្ឍនៈ ដល់ផ្សារាត្រី និង ទីតាំងបាសាក់លែន ។

ប៉ុន្តែ​សម្រាប់​ផ្សារទួលទំពូង គឺធ្វើឡើង០៩ថ្ងៃ លើសបណ្តាទីតាំងធំៗទាំងអស់ខាងលើ ដោយ​ចាប់​ផ្តើម​ពី​ថ្ងៃទី១១នេះ ដល់ថ្ងៃទី១៩ ខែមេសា ឆ្នាំ២០២៦ ទើបបញ្ចប់៕ អត្ថបទ៖ លីហេង