ប្រធានសភាអ៊ីរ៉ង់ លោក Mohammad Baqer Qalibaf កាលពីថ្ងៃសុក្រ បានទាមទារឲ្យមានបទឈប់បាញ់ នៅក្នុងប្រទេសលីបង់ និងការដោះលែងទ្រព្យសកម្មដែលត្រូវបានបង្កករបស់ខ្លួន មុនពេលចាប់    ផ្តើមការចរចាជាមួយសហរដ្ឋអាមេរិក។

លោកបានធ្វើការអត្ថាធិប្បាយនេះ នៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម X ខណៈពេលដែលកំពុងពន្យល់លម្អិតអំពីបុរេលក្ខខណ្ឌរបស់អ៊ីរ៉ង់សម្រាប់ការចូលរួមក្នុងការចរចា ដើម្បីបន្ធូរបន្ថយភាពតានតឹងនៅមជ្ឈិមបូព៌ា ដែលត្រូវបានគេរំពឹងថា នឹងធ្វើឡើងនៅរដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន បន្ទាប់ពីការប្រកាសពីបទឈប់បាញ់រយៈពេលពីរសប្តាហ៍រវាងភាគីជម្លោះនេះ។

លោក Qalibaf បានថ្លែងថា៖«វិធានការពីរដែលបានព្រមព្រៀងគ្នារវាងភាគីទាំងពីរ មិនទាន់ត្រូវបានអនុវត្តនៅឡើយទេ៖ បទឈប់បាញ់នៅក្នុងប្រទេសលីបង់ និងការដោះលែងទ្រព្យសកម្មដែលត្រូវបានបង្កក របស់អ៊ីរ៉ង់ មុនពេលចាប់ផ្តើមការចរចា» ដោយសង្កត់ធ្ងន់ថា បញ្ហាទាំងពីរនេះ ត្រូវតែបំពេញ មុនពេលចាប់ផ្តើមការចរចា»។

ទីភ្នាក់ងារសារព័ត៌មានផ្លូវការ IRNA បានរាយការណ៍ផងដែរថា រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi កាលពីថ្ងៃសុក្រ បានអំពាវនាវឲ្យសហរដ្ឋអាមេរិក បំពេញកាតព្វកិច្ចរបស់ខ្លួន ក្រោម  បទឈប់បាញ់ ទាក់ទងនឹងភាពចាំបាច់ ដើម្បីបញ្ឈប់ការវាយប្រហាររបស់អ៊ីស្រាអែល ប្រឆាំងនឹងប្រទេសលីបង់៕