កងកម្លាំងចល័តប្រជាប្រិយរបស់អ៊ីរ៉ាក់ (PMF) បាននិយាយកាលពីថ្ងៃសុក្រថា សមាជិកប្រហែល ៨០ នាក់ ត្រូវបានសម្លាប់ និង ២៧០នាក់ ផ្សេងទៀត រងរបួស នៅក្នុងការវាយប្រហាររបស់សហរដ្ឋអាមេរិក-អ៊ីស្រាអែល នៅក្នុងប្រទេសអ៊ីរ៉ាក់ចន្លោះថ្ងៃទី ២៨ ខែកុម្ភៈ ដល់ថ្ងៃទី ៨ ខែមេសា។

កងកម្លាំងចល័តប្រជាប្រិយរបស់អ៊ីរ៉ាក់ បាននិយាយនៅក្នុងសេចក្តីថ្លែងការណ៍មុនៗថា ទីបញ្ជាការ និងទីតាំងឈរជើងរបស់ខ្លួនទូទាំងប្រទេសនេះ ត្រូវបានរងការទម្លាក់គ្រាប់បែកស្ទើរតែរាល់ថ្ងៃ ចាប់តាំងពីចុងខែកុម្ភៈមក។

ក្នុងអំឡុងពេលនេះ ក្រុមតស៊ូឥស្លាមនៅអ៊ីរ៉ាក់ ដែលជាអង្គភាពឆត្រសម្រាប់កងជីវពលគាំទ្រអ៊ីរ៉ង់របស់អ៊ីរ៉ាក់ បាននិយាយថា ខ្លួនបានចាប់ផ្តើមប្រតិបត្តិការរាប់រយដែលកំណត់គោលដៅលើផលប្រយោជន៍របស់សហរដ្ឋអាមេរិក នៅក្នុងប្រទេសអ៊ីរ៉ាក់ និងតំបន់នេះ។

សហរដ្ឋអាមេរិក និងអ៊ីស្រាអែល បានរួមគ្នាបើកការវាយប្រហារលើអ៊ីរ៉ង់ នៅថ្ងៃទី ២៨ ខែកុម្ភៈ ដែលអ៊ីរ៉ង់ និងសម្ព័ន្ធមិត្តក្នុងតំបន់របស់ខ្លួន បានឆ្លើយតបដោយការវាយប្រហារលើផលប្រយោជន៍របស់អ៊ីស្រាអែល និងសហរដ្ឋអាមេរិក នៅទូទាំងមជ្ឈិមបូព៌ា៕