ដើម្បីទទួលបានព័ត៌មានថ្មីៗ រហ័ស សូមចុច Join Channel Telegram BTV News 

ភ្នំពេញ៖ ខណៈពិធីបុណ្យចូលឆ្នាំថ្មី ប្រពៃណីជាតិ ខិតជិតចូលមកដល់ មន្រ្តីជំនាញ នៃក្រសួងសុខាភិបាល បាន ក្រើន​រម្លឹក​ដល់ពលរដ្ឋ ត្រូវរួសរាន់ទៅទទួលការចាក់វ៉ាក់សាំងដូសជំរុញ ដើម្បីបង្កើនអង់ទីគ័រទប់ស្កាត់ការឆ្លងជំងឺកូវីដ-១៩។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការ ចំពោះកិច្ច​ចាក់​វ៉ាក់សាំង​បង្ការជំងឺកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) បានក្រើនរម្លឹក ដល់ប្រជាពលរដ្ឋ​ដែល​បាន​ចាក់​វ៉ាក់សាំង​ដូស​មូលដ្ឋានរួចរាល់ ដែលមានគម្លាតចាប់ពី៤ខែឡើង ត្រូវរួស រាន់ទៅចាក់វ៉ាក់សាំងដូសជំរុញទី៣ និងទី៤ ដើម្បីបង្កើន​អង់ទីគ័រ ទប់ទល់នឹងការវាយលុកពីជំងឺកូវីដ-១៩ ខណៈពិធីបុណ្យចូលឆ្នាំថ្មី ប្រពៃណីជាតិ នឹងចូលមក​ដល់​ក្នុង​រយៈពេល​១០ថ្ងៃទៀត។ លោកជំទាវ ក៏បានអំពាវនាវផងដែរដល់ពលរដ្ឋ ឱ្យបន្តអនុវត្តវិធានសុខាភិបាល និងវិធានការ៣កុំ ៣ការពារ ទោះ​ចាក់​វ៉ាក់សាំង​រួចក្តី។

បច្ចុប្បន្ន រាជរដ្ឋាភិបាលកម្ពុជា អាចគ្រប់គ្រងស្ថានការណ៍ជំងឺកូវីដ-១៩បាន ដោយប្រើប្រាស់យុទ្ធ សាស្រ្ត​ចម្បង​ចាក់​ស្រោច​វ៉ាក់សាំងជូនប្រជាពលរដ្ឋអាយុពី៣ឆ្នាំឡើង។ ក្រោយពេលគ្រប់គ្រងស្ថានការណ៍ ជំងឺបាន នៅឆ្នាំ២០២២ រាជរដ្ឋាភិបាលកម្ពុជា សម្រេចរៀបចំពិធីបុណ្យចូលឆ្នាំថ្មី ប្រពៃណីជាតិឡើងវិញ បន្ទាប់ពីខកខានអស់រយៈពេល២ឆ្នាំ ដោយសារ​ការរាតត្បាតនៃជំងឺសកលកូវីដ-១៩៕ អត្ថបទ៖ ទូច សោភ័ណ