កំពង់ឆ្នាំង៖ តាមការបញ្ជាក់ពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នៅ​ព្រឹក​ថ្ងៃ​ទី១១ ខែមេសា ឆ្នាំ២០២៦នេះថា ក្រុមការងារខេត្តកំពង់ឆ្នាំងបានរៀបចំតុបតែងលម្អរ នៅ​តាម​ទី​តាំង​មួយ​ចំនួន ដើម្បីទទួលភ្ញៀវជាតិ អន្តរជាតិ សម្រាប់ពិធីសង្ក្រាន្តឆ្នាំថ្មី ២០២៦ បាន​រួច​រាល់​ហើយ​។ ទីតាំងប្រារព្ធ​សង្ក្រាន្តធំជាងគេ គឺត្រូវប្រារព្វនៅសួនវិមានឯករាជ្យ និងសួនបាញ់ទឹក ក្នុង​ក្រុង​កំពង់ឆ្នាំង មុខសាលាខេត្តកំពង់ឆ្នាំងតែម្តង។

ឯកឧត្តមអភិបាលខេត្តបានបន្តថា ដើម្បីការរៀបចំព្រឹត្តិការណ៍ “សង្ក្រាន្តកំពង់ឆ្នាំង” នេះ​ទទួល​បាន​ជោគ​ជ័យ និងមានសោភ័ណភាពស្រស់បំព្រង សមស្របទៅតាមទំនៀមទម្លាប់ប្រពៃណី វប្បធម៌​ដ៏​ល្អផូ​រផង់របស់ជាតិខ្មែរ ឯកឧត្តម ស៊ុន សុវណ្ណារិទ្ធិ បានដឹកនាំមន្ត្រីជំនាញ ចុះ​ពិនិត្យ​ទីតាំង ​ដែលបានរៀបចំមានភ្លើងពណ៌ ទង់ជាតិ ទង់សាសនា និងទង់ព្រះ​មហាក្សត្រ​តាម​ទីតាំង​ដែល​​បាន​ប្រជុំកំណត់រួច។ រដ្ឋបាលខេត្តបានរៀបចំសង្ក្រានខេត្តកំពង់ឆ្នាំង ឆ្នាំ២០២៦នេះ តាម​ផែន​ការគ្រោងទុក ដោយឆ្នាំនេះ រដ្ឋបាលខេត្ត បានរៀបចំព្រឹត្តិការណ៍សង្ក្រាន្ត ដែលប្រារព្ធ​ធ្វើ​ឡើង​នៅ​ក្នុង​ក្រុងកំ​ពង់ឆ្នាំង តាមបណ្តាវត្តអារាម និងទីរម្យណីយដ្ឋាននានា មានរយៈពេល៣ថ្ងៃ ចាប់​ពី​ថ្ងៃ​ទី​១៤-១៥-១៦ ខែមេសា ឆ្នាំ២០២៦ ខាងមុខ។ ឯកឧត្តម បានណែនាំឲ្យក្រុមការងារ និង​មន្ត្រី​ពាក់ព័ន្ធ អោយបាញ់ទឹកសំអាតផ្លូវ ធ្វើអនាម័យបរិស្ថាន កុំអោយមាន​ដី​ហុយ​ប៉ះ​ពាល់​ដល់​ភ្ញៀវទេសចរ​ផងដែរ។

គិតមកដល់ថ្ងៃទី១១ ខែមេសា ឆ្នាំ២០២៦នេះ ក្រោមការណែ​នាំ​ពីឯកឧត្តម​អភិបាល​ខេត្ត​កំពង់​ឆ្នាំង ​ក្រុមការងារជំនាញនានា និងមន្ទីរអង្គភាពពាក់ព័ន្ធរបស់រដ្ឋបាលខេត្តកំពង់ឆ្នាំង បាន​រៀប​ចំ​តុប​តែង​លម្អសោភ័ណភាពនៅតាមសួនច្បារសាធារណៈនានា ជាពិសេសនៅរមណីយដ្ឋាន និង​វត្ត​អារាមនានា និងតាមដងវិថី នៅក្នុងកំពង់ឆ្នាំង ក៏ដូចតាមបណ្តាស្រុក ដើម្បី​ត្រៀម​រៀប​ចំ​ព្រឹត្តិការណ៍ ​“សង្ក្រាន្តកំពង់ឆ្នាំង” អោយបានល្អ។

ដើម្បីចូលរួម​អបអរសាទរក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៦នេះ និង​ចូល​រួម​ថែរក្សាការពារទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ ទាក់ទាញ​ភ្ញៀវ​ទេសចរ​ជាតិ-​អន្តរជាតិ ជាពិសេសបង្ហាញពីការដឹងគុណយ៉ាងជ្រាលជ្រៅ និងផ្សារ​ភ្ជាប់​ពិធី​បុណ្យចូល​ឆ្នាំ​ជា​មួយ​វីរកងកម្លាំងជួរមុខ និងពលរដ្ឋភៀសសឹក ក្រោមស្មារតីការរួបរួមសាមគ្គី នៃមហា​គ្រួសារ​ខ្មែរ​តែ​មួយ ​រដ្ឋបាលខេត្តក៏មានការរៀបចំកម្មវិធីប្រពៃណីសាសនា និងកម្មវិធីមួយចំនួន ដូចជា ពិធី​ទទួល​ទេវតា​ឆ្នាំថ្មី ពូនភ្នំខ្សាច់ ស្រង់ព្រះ សម្តែងទស្សនីយភាពសិល្បៈវប្បធម៌ជាច្រើនទម្រង់ លេង​ល្បែង​ប្រជាប្រិយ​ជាតិ ការធ្វើនំខ្មែរ និងការតាំងពិព័រណ៍ផលិតផលក្នុងស្រុក។ ជាមួយគ្នានេះ ឯកឧត្តម បានអំពាវនាវដល់ប្រជាពលរដ្ឋពីគ្រប់មជ្ឈដ្ឋាន អញ្ជើញមកចូល​រួម​ទស្សនា​កម្សាន្ត​ក្នុង​ព្រឹត្តិការណ៍​“សង្ក្រាន្តកំពង់ឆ្នាំង” អោយបានច្រើនកុះករ ក្រោមម្លប់សន្តិភាពដ៏ត្រជាក់ត្រជំ និង​ក្រោម​ស្មារតី​សាមគ្គីភាព ឯកភាព និងភាពធន់៕ កាំង ហុងវាស្នា