​រុស្ស៊ី៖ ក្រសួងការពារជាតិ​រុស្ស៊ី​បាន​និយាយថា កងកម្លាំង​រុស្ស៊ី​បាន​បំផ្លាញ​មជ្ឈមណ្ឌល​គ្រប់គ្រងអាកាសចរណ៍ និង​ការពារ​ដែនអាកាស​រប​ស់អ៊ុយ​ក្រែ​ន​នៅក្នុង​ទីក្រុង​គី​វ​។ ចំណត​យន្តហោះ និង​ឃ្លាំង​ស្តុក​ប្រេងឥន្ធនៈត្រូវបាន​បំផ្លាញដោយសារ​ការវាយប្រហារនៅ​អាកាសយានដ្ឋាន ​Balovne ក្នុង​ទីក្រុង ​Mykolaiv​។

​ជាមួយគ្នានេះ​អ្នកនាំពាក្យ​ក្រសួងការពារជាតិ​រុស្ស៊ីលោក Igor Konashenkov បាន​និយាយ​ក្នុងសន្និសីទ​សារព័ត៌មានថា ​មជ្ឈមណ្ឌល​គ្រប់គ្រង​អាកាសចរណ៍ និង​ការពារ​ដែនអាកាស​រប​ស់អ៊ុយ​ក្រែ​ននៅ​អាកាសយានដ្ឋាន Vassylkiv ក្នុង​ទីក្រុង​គី​វក៏​ត្រូវបាន​បំផ្លាញ។​ ឃ្លាំង​ស្តុក​ប្រេងឥន្ធនៈ​ធំៗ​ក្នុង​ក្រុង​ Mykolaiv, ក្រុង ​Slavuta, ក្រុង ​Rivne និង​ក្រុង ​Ternopil ត្រូវបានវាយប្រហារ​ដោយ​ការបាញ់​ផ្លោង​។ ឃ្លាំង​ទាំងនេះ​ត្រូវបាន​ប្រើប្រាស់ដើម្បី​ផ្គត់ផ្គង់​ប្រេងឥន្ធនៈសម្រាប់​កងទ័ព​អ៊ុយ​ក្រែ​ន​ក្នុង​តំបន់ Mykolaiv និង Donetsk​។​ អ្នកនាំពាក្យ​ក្រសួង​បាន​និយាយថា កងទ័ពអាកាស​យុទ្ធសាស្ត្រ​របស់​រុស្ស៊ីបាន​វាយប្រហារ​គោលដៅយោធា​ចំនួន ៤២​កន្លែងនៅ​អ៊ុយ​ក្រែ​ន រួមទាំង​ប្រព័ន្ធ​មី​ស៊ី​ល​ចំនួន​បី​៕

អត្ថបទ៖ ប៊ុនថន