រុស្ស៊ី៖ ទូរទស្សន៍រដ្ឋរុស្ស៊ីបានចេញផ្សាយវីដេអូដែលបានបង្ហាញពី កងទ័ពកំពុងប្រយុទ្ធជាមួយកងកម្លាំងអ៊ុយក្រែនក្នុងទីក្រុង Mariulpol។ យោងតាមប្រព័ន្ធផ្សព្វផ្សាយបានឲ្យដឹងថា ការប្រយុទ្ធគ្នានៅតែបន្ត ខណៈទាហានរុស្ស៊ី និងអ៊ុយក្រែនប្រយុទ្ធគ្នា ដើម្បីដណ្តើមយកការគ្រប់គ្រងទីក្រុងដែលត្រូវបានឡោមព័ទ្ធ។
វីដេអូបានបង្ហាញយានយន្តយោធាមានសញ្ញាអក្សរ Z ដែលបានលាបនៅលើយានយន្ត។ អក្សរ Z និងអក្សរ V ត្រូវបានប្រើលើយានរថពាសដែករបស់រុស្ស៊ីក្នុងប្រទេសអ៊ុយក្រែន។ ជនស៊ីវិលប្រមាណ ១សែននាក់ត្រូវបានគេជឿថាបានជាប់នៅក្នុងទីក្រុង Mariulpol ដែលនៅតែត្រូវបានកាត់ផ្តាច់ពីខ្សែសង្វាក់ផ្គត់ផ្គង់ រួមមានស្បៀងអាហារ ទឹក ប្រេងឥន្ធនៈ និងថ្នាំពេទ្យ។ ទូរទស្សន៍រដ្ឋបានបង្ហាញប្រជាជនកំពុងចម្អិនអាហារ ដោយប្រើប្រាស់ចង្ក្រានដុតអុស។
ក្រសួងការពារជាតិរុស្ស៊ីបានចែករំលែកវីដេអូបង្ហាញ កងទ័ពរុស្ស៊ីកំពុងដោះមីននៅទីតាំងច្រើនកន្លែងក្នុងតំបន់ Sumy។ ក្រសួងបានបង្ហាញអគារជាច្រើនដែលត្រូវបានបំផ្លាញ រួមមានអគារសាលារៀន ដោយបាននិយាយថា កងកម្លាំងប្រដាប់អាវុធអ៊ុយក្រែនបានបំផ្លាញអគារសាលារៀន សាលាមត្តេយ្យ អគាររដ្ឋបាល និងហេដ្ឋារចនាសម្ព័ន្ធស៊ីវិល៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
