ប្រទេសកម្ពុជា ត្រូវបានចាត់ថ្នាក់ឈរនៅលំដាប់ទី៥ ក្នុងតំបន់អាស៊ាន ជាប្រ​ទេស​កំពុង​អភិវឌ្ឍ​ដែល​មាន​ភាពទាក់ទាញសម្រាប់វិនិយោគ។ ការវាយតម្លៃនេះ ត្រូវបានបង្ហាញ​ក្នុង​របាយ​ការណ៍​សន្ទស្សន៍​ឱកាសវិនិយោគសកល (Global Opportunity Index) ប្រចាំឆ្នាំ២០២៦ របស់​វិទ្យាស្ថាន​ ម៉ាល ខិន (Milken Institute) ដែលជាស្ថាប័ន​ឯករាជ្យ​មាន​មូល​ដ្ឋាននៅ​សហរដ្ឋអាម៉េរិក។

ក្នុងបរិបទដែលក្រុមហ៊ុនអន្តរជាតិកំពុងពង្រីក និងបំបែកខ្សែសង្វាក់ផ្គត់ផ្គង់ ដើម្បី​ឆ្លើយ​តប​នឹង​ហានិភ័យ​ភូមិ​សាស្ត្រនយោបាយកើនឡើង តំបន់អាស៊ីអាគ្នេយ៍ កំពុងក្លាយជា​គោល​ដៅ​ថ្មី​សម្រាប់​វិនិយោគិន​សកល។ ប្រទេសកំពុងអភិវឌ្ឍក្នុងតំបន់នេះ ក៏កំពុងទទួលបាន​ការ​ចាប់​អារម្មណ៍​ឡើង​វិញ​ ដោយសារសក្ដានុពលកំណើន និងទីផ្សារដែលកំពុងរីកចម្រើនយ៉ាងលឿន។ យោង​តា​ម​របាយ​កា​រណ៍ខាងលើ ប្រទេសម៉ាឡេស៊ី ឈរនៅលំដាប់ទី១ ក្នុងអាស៊ាន ជាគោល​ដៅ​វិនិយោគ​ដ៏​ទាក់​ទាញ​បំផុត បន្ទាប់មកគឺវៀតណាម (ទី២) ឥណ្ឌូនេស៊ី (ទី៣) ហ្វីលីពីន (ទី៤) កម្ពុជា (ទី៥) និងឡាវ (ទី៦)។

របាយការណ៍នេះបានពិនិត្យទីផ្សារកំណើនខ្ពស់ចំនួន៦នេះ ដែមមាន​អត្រា​កំណើន​ផលិតផលក្នុងស្រុកសរុបពិតប្រាកដ (GDP) នៅឆ្នាំ២០២៤ ចន្លោះពី ៤,៣% ដល់ ៧,១% ដែលធ្វើឲ្យពួកគេក្លាយជាក្រុមសេដ្ឋកិច្ចមានកំណើនលឿនក្នុងចំណោមប្រទេសកំពុងអភិវឌ្ឍ។ការវាយតម្លៃបរិយាកាសវិនិយោគ ត្រូវបានធ្វើឡើងដោយផ្អែកលើកត្តាសំខាន់៥ រួមមាន ការយល់ឃើញអាជីវកម្ម, មូលដ្ឋានគ្រឹះសេដ្ឋកិច្ច, សេវាកម្មហិរញ្ញវត្ថុ, ក្របខ័ណ្ឌស្ថាប័ន, និងស្តង់ដារ និងគោលនយោបាយអន្តរជាតិ។ បន្ថែមពីនេះ របាយការណ៍ក៏បានវិភាគអំពីលំហូរចូលមូលធន និងសកម្មភាពបញ្ចូលគ្នា និងទិញយកឆ្លងដែន ដែលបង្ហាញពីទិសដៅវិនិយោគក្នុងតំបន់។ 

របាយការណ៍បន្ថែមថា ការវិនិយោគផ្ទាល់ពីបរទេស (FDI) នៅតែជាចំណែកសំខាន់បំផុតនៃលំហូរចូលដើមទុនបរទេសក្នុងប្រទេសទាំង៦ ដោយមានសមាមាត្រជាង ៧០% នៃចំនួនសរុបក្នុងអំឡុងឆ្នាំ២០២១ ដល់ ឆ្នាំ២០២៤។ ខណៈពេលដូចគ្នា លំហូរចូលផ្សេងៗ ដូចជា ផលប័ត្រ និងឥណទានធនាគារ មានការប្រែប្រួលគួរឲ្យកត់សម្គាល់ក្នុងរយៈពេលមួយទសវត្សរ៍កន្លងមក។ ការចូលរួមរបស់កម្ពុជា ក្នុងចំណោមប្រទេសដែលមានសក្ដានុពលកំណើនខ្ពស់នៅអាស៊ីអាគ្នេយ៍ បង្ហាញពីឱកាសថ្មីសម្រាប់ការទាក់ទាញវិនិយោគ និងការអភិវឌ្ឍសេដ្ឋកិច្ចនៅអនាគត៕ អត្ថបទ៖ ធូ វិរៈ