នៅថ្ងៃដើមសប្ដាហ៍នេះ ភៀវទេសចរជាតិ និងអន្តរជាតិ បាននាំ​គ្នា​ដើរ​លេង​កម្សាន្ត​នៅ​ទីតាំង​រៀប​ចំ​ព្រឹត្តិការណ៍ «នគរសង្ក្រាន្ត» នៅរមណីដ្ឋានប្រវត្តិសាស្រ្តវត្តភ្នំ ដែលមាន​ការតុប​តែង​លម្អ​បែប​ប្រពៃណី​ជាតិ​យ៉ាងស្រស់ស្អាត។

ក្នុងពេលដើរលេងកម្សាន្តនៅរមណីដ្ឋានប្រវត្តិសាស្រ្តវត្តភ្នំ ភ្ញៀវទេសចរជាតិ បានបង្ហាញការ​មើល​ឃើញ​អំពី​ការតុបតែងលម្អបែបប្រពៃណីជាតិនៅតំបន់វត្តភ្នំ មានភាពស្រស់ស្អាត ពោលគឺការ​តុប​តែង​រូប​សេះ តំណាងឆ្នាំមមី និងឧបករណ៍ភ្លេងខ្មែរ ជាដើម។

ភ្ញៀវទេសចរ បានអះអាងថា ពួកគេនឹងនឹងចូលរួមលេងកម្សាន្តក្នុងព្រឹត្តិការណ៍ «នគរសង្ក្រាន្ត» ដែល​មាន​ទស្សនីយភាពជាច្រើន និងជូនពរដល់វីរកងទ័ពនៅជួរមុខ ក្នុងឱកាស​ពិធី​បុណ្យ​ចូល​ឆ្នាំ​ថ្មី ប្រពៃណីជាតិ មានសុខភាពល្អ និងសុវត្ថិភាព។

ភ្ញៀវទេសចរអន្តរជាតិ បានស្ងើចសរសើរ បង្ហាញអារម្មណ៍​រីក​រាយ​ពេល​ឃើញ​ការ​តុប​តែង​លម្អ​នៅ​រមណីយដ្ឋាន​ប្រវត្តិសាស្រ្តវត្តភ្នំមានភាពល្អប្រណីត និងអំនាវនាវដល់ភ្ញៀវទេសចរដដៃទៀត អាច​ម​ក​លេងប្រទេសកម្ពុជាក្នុងពេលប្រារព្ធពិធីបុណ្យចូលឆ្នាំខ្មែរ។

ដើម្បី​អបអរសាទរពិធីបុណ្យចូលឆ្នាំថ្មី ប្រពៃណីជាតិ សហភាពសហព័ន្ធយុវជនកម្ពុជា សហការ​ជាមួយ​រដ្ឋបាលរាជធានីភ្នំពេញ និងស្ថាប័នពាក់ព័ន្ធនានា រៀបចំព្រឹត្តិការណ៍ «នគរសង្ក្រាន្ត» ដោយ​ចាប់​ពីថ្ងៃទី ១៤ រហូតដល់ថ្ងៃទី ១៩ ខែមេសា ឆ្នាំ២០២៦ ស្ថិតនៅរាជធានីភ្នំពេញ។ ស្ថិត​នៅ​ក្នុងព្រឹត្តិការណ៍ «នគរសង្ក្រាន្ត» ទីតាំងរមណីដ្ឋានប្រវត្តិសាស្រ្តវត្តភ្នំ មានកម្មវិធីដូចជា៖ យុទ្ធគុន​ចម្រុះខ្មែរបុរាណ, របាំប្រពៃណី និងប្រជាប្រិយ, ល្បែងប្រជាប្រិយ និងតន្រ្តីសួស្តីឆ្នាំថ្មី៕ អត្ថបទ៖ ទូច សោភ័ណ