អាកាសយានដ្ឋានអន្ដរជាតិភ្នំពេញ（ព្រលានយន្តហោះចាស់) បើកជាសួនសាធារណៈ សម្រាប់​ពលរដ្ឋ​ចូលទស្សនា ក្នុងឱកាសបុណ្យចូលឆ្នាំថ្មីនេះ កំពុងបើកបង្ហាញនូវទម្រង់សិល្បៈវប្បធម៌ខ្មែរ យ៉ាង​រស់រវើក ដើម្បីអបអរសាទ និងស្វាគមន៍ភ្ញៀវទេសចរ។

ប្រជាពលរដ្ឋ និងយុវជន ដែលបានចូលទៅទស្សនាទីតាំង​អាកាស​យាន​ដ្ឋាន​អន្ដរជាតិ​ភ្នំពេញ​(ព្រលាន​យន្តហោះចាស់) បានប្រាប់ BTV កាលពីល្ងាចថ្ងៃទី១២ ខែមេសា ឆ្នាំ២០២៦ ថា ពួក​គេ​រីក​រាយដែលបានចូលដល់ទីតាំង ច្រកចេញចូល VIP ចំណត និងផ្លូវរត់របស់យន្ដហោះ។ ហើយអ្វី​ដែល​ពួកគាត់ ពេញចិត្តនោះ គឺការបើកបង្ហាញនូវទម្រង់សិល្បៈវប្បធម៌ខ្មែរ ដូចជាការ​លេង​ឧបករណ៍ភ្លេងខ្មែរ តន្រ្ដីឆៃយ៉ាំ របាំត្រុដិ និងការរាំងលេង ចង្វាក់ប្រពៃណីខ្មែរ។

ពួកគេថា ការបង្ហាញសិល្បៈវប្បធម៌ខ្មែរបែបនេះ មិនត្រឹមតែជាការបណ្ដុះស្មារតីកុមារឲ្យស្គាល់សិល្បៈវប្បធម៌ខ្មែរ និងផ្សព្វផ្សាយដល់ភ្ញៀវបរទេស ប៉ុណ្ណោះទេ តែក៏ជាផ្នែកមួយជួយដល់សេដ្ឋកិច្ចអ្នកលក់ដូរនៅជុំវិញតំបន់នោះផងដែរ។

ឯកឧត្ដម ស៊ីន ចាន់សិរីវុត្ថា អ្នកនាំពាក្យអាកាសចរណ៍ស៊ីវិល បានប្រាប់ BTV នៅថ្ងៃទី១៣ ខែមេសានេះថា ប្រជាពលរដ្ឋច្រើនបានចូលទៅលេងនៅអាកាសយានដ្ឋានអន្ដរជាតិភ្នំពេញចាស់ ចាប់ពីថ្ងៃទី១១ ខែមេសា។ តាមរយៈចំនួននេះ រដ្ឋាភិបាលអាចពិចារណាបន្តពេលវេលាបើករយៈពេលយូរ បូករួមនិងការរៀបចំឲ្យមានសកម្មភាពសិល្បៈវប្បធម៌ផងដែរ។

សូមជម្រាបជូនថា ដើម្បីអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរ រាជរដ្ឋាភិបាល បានប្រកាសបើក អាកាសយានដ្ឋានអន្ដរជាតិភ្នំពេញចាស់ ជាសួនសាធារណៈ ចាប់ពីថ្ងៃទី១១ ដល់ថ្ងៃទី១៩ ខែមេសា ឆ្នាំ២០២៦ បើកពីម៉ោង ៥៖០០នាទីព្រឹក ដល់ម៉ោង ៩៖០០នាទីយប់។ ប្រជាពលរដ្ឋអាចចូលទៅទស្សនាទីតាំងសំខាន់ រួមមាន អគារស្ថានីយ ប៉មបញ្ជា ទសវត្សរ៍ ឆ្នាំ១៩៥០ តំបន់ជុំវិញបរិវេណអគារចេញ-ចូល អ្នកដំណើរ VIP, ចំណតយន្ដហោះ និងតំបន់រត់ របស់យន្ដហោះជាដើម។ ហើយពលរដ្ឋក៏អាចយកអាហារទៅបរិភោគជួបជុំក្រុមគ្រួសារបានផងដែរ ក៏ប៉ុន្ដែគ្រឿងស្រវឹង និងអាវុធគ្រឿងផ្ទុះផ្សេងៗត្រូវហាមឃាត់៕ អត្ថបទ៖ លៀ ស៊ីណា