កាលពីថ្ងៃអាទិត្យ (ទី១២ ខែមេសា ឆ្នាំ២០២៦) ប្រធានសភាអ៊ីរ៉ង់ ដែលបានដឹកនាំការចរចាសន្តិភាពជាមួយសហរដ្ឋអាមេរិក នៅក្នុងប្រទេសប៉ាគីស្ថាន បាននិយាយថា ប្រទេសរបស់លោក នឹងមិនចុះញ៉មជាមួយការគំរាមកំហែងនោះទេ បន្ទាប់ពីប្រធានាធិបតីអាមេរិក លោក Donald Trump បានបញ្ជាឲ្យបិទច្រកសមុទ្រយុទ្ធសាស្ត្រ Hormuz។

ទីភ្នាក់ងារសារព័ត៌មានអ៊ីរ៉ង់ជាច្រើន បានរាយការណ៍ថា បន្ទាប់ពីបានទៅដល់ទីក្រុងតេអេរ៉ង់ ក្រោយដំណើរការចរចា នៅទីក្រុងអ៊ីស្លាម៉ាបាដ លោក Mohammad Bagher Ghalibaf បានប្រាប់អ្នកសាព័ត៌មានថា៖ «ប្រសិនបើពួកគេប្រយុទ្ធ យើងនឹងប្រយុទ្ធ ហើយប្រសិនបើពួកគេចេញមកដោយមានហេតុផល យើងនឹងដោះស្រាយជាមួយនឹងភាពសមហេតុសមផលដូចគ្នា។ យើងនឹងមិនព្រមចុះញ៉ម ចំពោះការគំរាមកំហែងណាមួយជាដាច់ខាត បណ្ដោយឲ្យពួកគេសាកល្បងជាមួយឆន្ទៈរបស់យើងម្តងទៀតចុះ ដើម្បីឲ្យយើងអាចបង្រៀនពួកគេនូវមេរៀនដ៏ធំមួយ»។

ចំណែកមេបញ្ជាការកងទ័ពជើងទឹកអ៊ីរ៉ង់ លោក Shahram Irani បានហៅការគំរាមរបស់លោក Trump ក្នុងការបិទច្រកសមុទ្រ Hormuz ថា ជារឿង «គួរឲ្យអស់សំណើច» បន្ទាប់ពីកិច្ចចរចារយៈពេលយូរ រវាងទីក្រុងតេអេរ៉ង់ និងវ៉ាស៊ីនតោន នៅទីក្រុងអ៊ីស្លាម៉ាបាដ មិនអាចបង្កើតបាននូវកិច្ចព្រមព្រៀង ដើម្បីបញ្ចប់សង្គ្រាម នៅតំបន់មជ្ឈិមបូព៌ា។

កងឆ្មាំបដិវត្តន៍ឥស្លាមអ៊ីរ៉ង់ (IRGC) បានប្រាប់ថា នាវាយោធាណាមួយដែលព្យាយាមចូលជិតច្រកសមុទ្រ Hormuz នឹងត្រូវបានចាត់ទុកថា ជាការរំលោភលើបទឈប់បាញ់រយៈពេល ២សប្តាហ៍ ជាមួយសហរដ្ឋអាមេរិក ហើយនឹងត្រូវបានដោះស្រាយ «យ៉ាងខ្លាំងក្លា និងម៉ឺងម៉ាត់»។

គួរបញ្ជាក់ថា លោក Trump បានបញ្ជាឲ្យកងទ័ពជើងទឹកអាមេរិកបិទផ្លូវដឹកជញ្ជូនដ៏សំខាន់នៃច្រកសមុទ្រ Hormuz ដោយខឹងសម្បាយ៉ាងខ្លាំង ចំពោះការបដិសេធរបស់អ៊ីរ៉ង់ ក្នុងការបោះបង់មហិច្ឆតានុយក្លេអ៊ែររបស់ខ្លួន បន្ទាប់ពីការចរចាសន្តិភាព នៅក្នុងប្រទេសប៉ាគីស្ថាន បញ្ចប់ទៅដោយគ្មានកិច្ចព្រមព្រៀង៕