ទាញព្រ័ត្រ៖ សហព័ន្ធកីឡាទាញព្រ័ត្រកម្ពុជាបានបង្ហាញគោលដៅ ក្នុងការអភិវឌ្ឍវិស័យកីឡាអត្តសញ្ញាណជាតិមួយនេះឲ្យកាន់តែរីកចម្រើន ដើម្បីសម្រួចដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ នាឆ្នាំ២០២៣។ នេះបើតាមការបញ្ជាក់របស់ឯកឧត្តមបណ្ឌិត មាស សារិន ប្រធានសហព័ន្ធក្នុងសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២ នៅទីស្នាក់ការ NOCC កាលពីថ្ងៃទី០៤ ខែមេសា ឆ្នាំ២០២២។
ឯកឧត្តមប្រធានសហព័ន្ធមានប្រសាសន៍ថា ចាប់តាំងពីការកកើតសហព័ន្ធកាលពីឆ្នាំ២០០៥ សហព័ន្ធតែងតែខិតខំពង្រឹងការអភិវឌ្ឍ និងអភិរក្ស ព្រមទាំងថែរក្សាទុកកេរ្តិ៍ដំណែលនៃវប្បធម៌កុំឲ្យបាត់បង់ផង និងធ្វើទំនើបកម្មនៃប្រភេទកីឡាបែបល្បែងប្រជាប្រិយខ្មែរនេះផង។ បច្ចុប្បន្នសហព័ន្ធកំពុងប្រឹងប្រែងអភិវឌ្ឍប្រភេទកីឡាទាញព្រ័ត្រ ដែលជាយុទ្ធសាស្ត្រដ៏សំខាន់ក្នុងដំណើរឆ្ពោះទៅចូលរួមការប្រកួតលក្ខណៈអន្ដរជាតិនានា ពិសេសត្រៀមធ្វើម្ចាស់ផ្ទះព្រឹត្តិការណ៍ស៊ីហ្គេមឆ្នាំ២០២៣ ជាក់ស្ដែងសហព័ន្ធក៏កំពុងត្រៀមរៀបចំព្រឹត្តិការណ៍ “អង្គរកីឡាទាញព្រ័ត្រអន្តរជាតិ សុឆន្ទៈ ជើងឯកសមាគមនាឆ្នាំ២០២៣ នៅខេត្តសៀមរាប” ផងដែរ។ កញ្ញា មាស តឿ អគ្គលេខាធិការរងសហព័ន្ធ បានបន្ថែមថា សហព័ន្ធបានលើកកម្ពស់កែទម្រង់ ការគ្រប់គ្រង និងដឹកនាំដោយយកចិត្តទុកដាក់ក្នុងការបណ្តុះបណ្តាលមន្ត្រីរដ្ឋបាល មន្ត្រីបច្ចេកទេស អាជ្ញាកណ្ដាលចៅក្រមកម្រិតជាតិ និងកម្រិតអន្តរជាតិ។
លើសពីនេះ សហព័ន្ធក៏មានផែនការហ្វឹកហាត់ត្រឹមត្រូវ ធ្វើឲ្យប្រសិទ្ធភាពការងារមានភាពរលូន សមត្ថភាពបច្ចេកទេសរបស់កីឡាករ-កីឡាការិនីកាន់តែល្អប្រសើរ។ ទន្ទឹមជាមួយការដាក់ចេញនូវផែនការអភិវឌ្ឍវិស័យកីឡាទាញព្រ័ត្រ និងទិសដៅការងារឆ្នាំ២០២២ ក្នុងនោះអគ្គលេខាធិការរងសហព័ន្ធដដែល ក៏បានលើកបង្ហាញពីការកសាងធនធានមនុស្សក្នុងការត្រៀមប្រមូលផ្តុំគ្រូបង្វឹក កីឡាក-កីឡាការិនី ក្រុម A និងក្រុម B ក្នុងជុំរុំហ្វឹកហាត់នៅក្នុងមណ្ឌលប្រមូលផ្តុំនាខេត្តបាត់ដំបង សម្រាប់ត្រៀមចូលរួមប្រកួតលក្ខណៈអន្តរជាតិនានាក្នុងឆ្នាំ២០២២ និងត្រៀមរៀបចំវគ្គបណ្តុះបណ្តាលជាច្រើនទៀតផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
