រសៀលថ្ងៃទី១៣ ខែមេសា ឆ្នាំ២០២៦ ឯកឧត្តម បណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប បានអញ្ជើញជាអធិបតីភាពក្នុងកម្មវិធីបើកពិព័រណ៍ម្ហូបអាហារ និងល្បែងប្រជាប្រិយ ដែលរៀបចំឡើងនៅសួន “ខ្ញុំស្រលាញ់ខេត្តកែប”។

កម្មវិធីនេះត្រូវបានរៀបចំឡើងក្នុងគោលបំណងអបអរសាទរបុណ្យចូលឆ្នាំប្រពៃណីជាតិខ្មែរ ព្រមទាំងលើកកម្ពស់វប្បធម៌ ប្រពៃណី និងអត្តសញ្ញាណជាតិឲ្យកាន់តែរឹងមាំ។ ក្នុងឱកាសនោះ ក៍មានការតាំងបង្ហាញម្ហូបអាហារប្រពៃណីជាច្រើនប្រភេទ និងការរៀបចំលេងល្បែងប្រជាប្រិយ ដូចជា ចោលឈូង បោះអង្គុញ និងល្បែងប្រជាប្រិយផ្សេងៗទៀត។

ឯកឧត្តម បណ្ឌិត សោម ពិសិដ្ឋ បានមានប្រសាសន៍ថា ល្បែងប្រជាប្រិយ គឺជាមរតកវប្បធម៌ដ៏មានតម្លៃ ដែលបន្សល់ទុកពីបុព្វបុរសខ្មែរ ដែលមានសារៈសំខាន់ក្នុងការបណ្តុះស្មារតីសាមគ្គីភាព និងការសហការរវាងអ្នកជំនាន់មុន និងក្មេងៗជំនាន់ក្រោយ។

ឯកឧត្តមបានបន្តថា ការរៀបចំលេងល្បែងប្រជាប្រិយក្នុងឱកាសបុណ្យចូលឆ្នាំ មិនត្រឹមតែផ្តល់ភាពសប្បាយរីករាយប៉ុណ្ណោះទេ ប៉ុន្តែជាការចូលរួមអភិរក្ស និងផ្សព្វផ្សាយអត្តសញ្ញាណជាតិឲ្យបានបន្តជាយូរអង្វែង។

ក្រោយពី ឯកឧត្តម បណ្ឌិត សោម ពិសិដ្ឋ បានអញ្ជើញទស្សនាពិព័រណ៍ម្ហូបអាហារខ្មែរ ដ៏សម្បូរបែប និងបានភ្លក់ម្ហូបមួយចំនួនរួចមក ឯកឧត្តមបានលើកទឹកចិត្តដល់អ្នករៀបចំ និងអ្នកចម្អិនអាហារ ឲ្យបង្កើនការការយកចិត្តទុកដាក់ ខិតខំបង្ហាញស្នាដៃ ក្នុងន័យអភិរក្សរសជាតិតាមបែបខ្មែរ៕