ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ក្រសួងពាណិជ្ជកម្ម សហការជាមួយសហភាពសហព័ន្ធយុវជនកម្ពុជា (ស.ស.យ.ក) បានរៀបចំពិពរណ៍នគរសង្រ្កាន្ត ដោយនាំយកស្តង់ចូលរួមចំនួនសរុប១៨០ស្តង់ ដាក់តាំងបង្ហាញផលិតផលខ្មែរចម្រុះមុខ រួមមានទាំងផ្នែកភេសជ្ជៈ ចំណីអាហារ និងគ្រឿងអលង្ការជាដើម សុទ្ធសឹងជាផលិតផលក្នុងស្រុក។

សូមបញ្ជាក់ថា ពិព័រណ៍នគរសង្រ្កាន្តនេះ មានរយៈពេល៦ថ្ងៃ ចាប់ពីថ្ងៃទី១៤ ដល់១៩ ខែមេសា ឆ្នាំ២០២៦ ស្ថិតនៅសួនសងស្ពាននាគ តំបន់វត្តភ្នំ។ ពិព័រណ៍នេះ ធ្វើឡើងក្នុងគោលបំណងជំរុញចលនាគាំទ្រផលិតផលជាតិ និងបង្កើនចំណូល សម្រាប់អាជីវករ និងអ្នកប្រកបរបរក្នុងសេដ្ឋកិច្ចក្រៅប្រព័ន្ធ។ 

 នៅក្នុងពិព័រណ៍នគរសង្រ្កាន្តនេះ ក្រុមអាជីវករ បានឱ្យដឹងថា បាននាំយកផលិតផលជាច្រើនមុខទំនិញ មកដាក់តាំងបង្ហាញលក់ និងមានការផ្តល់ជូននូវតម្លៃយ៉ាងពិសេសផងដែរ ដើម្បីចូលរួមអបអរសាទរក្នុងពិធីបុណ្យចូលឆ្នាំប្រពៃណីជាតិខ្មែរ នេះ។ ក្រុមអាជីករ ក៏បានអំពាវនាវដល់សាធារណជនទូទៅទាំងអស់ចូលរួមព្រឹត្តការណ៍នគរសង្រ្កាន្តឱ្យបានច្រើនកុះករ ដើម្បីញាំងឱ្យកម្មវិធីកាន់តែសប្បាយរីករាយ ក៏ដូចជាមកស្វែងយល់អំពីវប្បធម៌ទំនៀមទម្លាប់ប្រពៃណីរបស់ដូនតា និងការស្គាល់ច្បាស់ពីអត្តសញ្ញាណជាតិ ក្រៅពីកម្មវិធីពិព័រណ៍នគរសង្រ្កាន្ត។

សូមបញ្ជាក់ថា ព្រឹត្តការណ៍ នគរសង្ក្រាន្ត រៀបចំឡើងក្នុងគោលបំណង មានដូចជា៖ ដើម្បីការថែរក្សាការពារ វប្បធម៌ ទំនៀមទម្លាប់ ប្រពៃណីរបស់ដូនតា និងការស្គាល់ច្បាស់ពីអត្តសញ្ញាណជាតិ គឺជាផ្នែកមួយនៃខឿនការពារជាតិដ៏រឹងមាំរបស់ប្រជាជន, ការទាក់ទាញទេសចរឱ្យមកទស្សនាកម្ពុជា និងយុទ្ធនាការ “ចូលឆ្នាំខ្មែរ មកលេងស្រុកខ្មែរ - Homecoming” ដោយ ផ្សព្វផ្សាយទៅកាន់បងប្អូនប្រជាពលរដ្ឋខ្មែរឯនាយសមុទ្រ អំពីអត្ថន័យនៃការជួបជុំសាច់ញាតិបងប្អូន ក្នុងឱកាសពិធីបុណ្យចូលឆ្នាំថ្មី ប្រកបដោយភាពកក់ក្តៅ និងមនោសញ្ចេតនានឹកនា និងវិលត្រឡប់មកលេងស្រុកកំណើតវិញ និងការផ្សារភ្ជាប់ជាមួយវីរកងកម្លាំង និងជនភៀសសឹក ដែលបង្ហាញពីការដឹងគុណ និងការយកចិត្តទុកដល់ពួកគាត់ ដែលកំពុងប្រឈមពីការឈ្លានពានជាដើម៕

អត្ថបទ៖ ឈិត បូរ៉ាវី